Кеси со смет, остатоци од мебел и апарати за домаќинство, мрши од животни се наоѓаат на дивата депонија што во долж од околу стотина метри е распослана на патот за Мирковци на влезот во општината Шуто Оризари.
Ова се гледа на видео снимките што до НОВАТВ ги испратија граѓани што секојдневно го минуваат овој пат. Депонијата според снимките се наоѓа во близина на магацините на Макошпед.
Според изјавите на граѓани ваквата состојба трае околу еден месец. И претходно тука се фрлал смет, но до пред еден месец тој се чистел со камиони и багери. Но оттогаш ситуацијата е ваква. Ваквата слика не само што претставува загадување на животната средина, туку е и потенцијален извор на зарази, особено сега во летниот период кога температурите се високи.
Во општината Шуто Оризари никој не се јавува на телефоните, ниту одговорија на имеилот што беше испратен до раководителот и до советникот во Одделението за урбанизам и заштита на животната средина во Оптината и до градоначалникот.
