На 67 годишна возраст во Скопје почина македонската актерка легенда, Ванчо Петрушевски. Трагичната вест на својот Фејсбук налог ја објави директорот на Драмски театар, Сашо Тасевски.
„Тукушто разбрав дека доајенот на Драмски театар и македонското глумиште, Ванчо Петрушевски, трагично го загуби животот. Почивај во мир Рамче“, напиша Тасевски.
Дел од неговите соработници, неофицијално, велат дека Петрушевски го загубил животот како последица на струен удар во неговата викендичка во Орешани што подоцна наиде на потврда и од извори во Министерството за внатрешни работи (МВР).
Петрушевски е роден на 19 април во 1951 година во Скопје. Веднаш по завршувањето на Високата музичка школа, отсек за актерски кадри во Скопје во 1975 година се вработил во Драмскиот театар во Скопје, каде неговиот талент го истакнал веќе во првата претстава „Ослободување на Скопје“ од Д. Јовановиќ.
Учествувал во голем број радио-драмски проекти, телевизиски драми, серии и слично. Познат е по улогите во Македонски народни приказни. Во 2016 година ја доби Државната награда „11 Октомври“ за остварување во областа на уметноста и културата.
Комеморацијата за актерот Ванчо Петрушевски ќе се одржи в понеделник во 10 часот во неговиот матичен Драмски театар
Неговите посмртни останки ќе бидат изложени од 12 до 13 часот во капелата на Градските гробишта во Бутел.