Легендарната македонска рок-група „Архангел“ најавува концерт, придружени од Македонската филхармонија. Концертот ќе се одржи во Спортскиот центар „Борис Трајковски“ на 26 октомври и се очекува да биде своевиден рок-спектакл. Повеќе од 60 луѓе на една сцена ќе се обидат да им дадат печат на легендарните хитови на бендот.
„По концертот во 2011 година, време е најголемата македонска рок-група на сцена да доживее нешто поинакво. Нешто оригинално и уникатно. Нешто што ќе потсетува на целата кариера и на сите успеси на бендот. Во 2011 нè потсетија дека македонски подобро звучи. Годинава во мода ја враќаат љубовта. Под мотото „Љубов“, Ристо Вртев и екипата ќе ви потврдат зошто во 1993 и во 1994 година ги добија наградите за најдобри настапи во живо“, се вели во соопштението на организаторите од „План Б продукција“.