Не утврден идентитетот, ниту се знае земјата од која доаѓаат двајцата мигранти кои загинаа во Сообраќајна несреќа на патот Радовиш-Штип, тврдат за НОВА од ОЈО. Како што објави НОВА телата на миграните два и пол месеци се наоѓаат во капелата во Бутел и од таму никој не може да ги подигне за да се погребат, бидејќи не се идентификувани.
„На починатите лица не им е утврден идентитетот, ниту земјата на потекло како би можело обвинителството да ја спроведе постапката за идентификација и да испрати ургентен допис до дипломатско претставништво на државата од која се верува дека потекнуваат лицата, со цел идна комуникација со нивни роднини“, се вели во одговорот за НОВА од ОЈО.
Од ОЈО потенцираат дека натамошната постапка во врска со погребот на починатите, доколку се јават роднини, ќе биде договорена и реализирана согласно желбите на роднините.
Доколку во даден временски рок не се пронајдат роднини на лицата, ниту пак се изврши успешна идентификација, следи погребување на гробиштата во Бутел, велат од ОЈО.
Од друга страна во невладината организација Легис кои два и пол месеци беа во потрага по телата, велат дека тие имале документи за идентификација кои тие лично ги виделе.
„Остантите членови на групата кои патуваа со починатите беше сместена прво во болницата во Штип, а подоцна во Транзитно Прифатниот Центар Винојуг. Кога ние ги посетивме прво во болницата,а потоа во кампот тие ни ги покажаа личните документи од лицата кои починаа. Лицата во кампот го познаваа нивниот идентитет и го потврдија пред нас. Откако се опоравија тие си заминаа од кампот. Ние им ветивме дека нивните пријатели ќе бидат погребани, но за жал, до ден денес тоа не е сторено. Се надевам дека набргу ќе се регулираат овие административни лавиринти, зошто се работи за човечкото достоинство“, изјави Мерсиха Смаиловиќ од невладината Легис.
И од МВР за НОВА потврдија дека е познат идентитетот на двајцата загинати, кои животот го загубија кога товарно возило „Ивеко“ со скопски регистарски ознаки, во кое биле превезувани мигранти излетало од коловозот и удрило во заштитна метална ограда од мост.
„Во несреќата на местото на настанот од страна на мртвопроверител од Здравствена установа Радовиш констатирана е смрт на две лица и тоа: С.А.Р. од Бангладеш чиј идентитет е утврден по пронајдена лична карта и другото лице С.А. – име кое е утврдено по кажување на еден од мигрантите, кој не бил брат на починатиот. Увидот на местото на настанот е извршен од страна ОЈО-Радовиш во содејство на Полициска станица Радовиш, Надворешната канцеларија за криминалистички работи Радовиш и Регионален центар Исток“, потврдија за НОВА од МВР, пред два дена.
Сообраќајната несреќа во која загинаа двајцата мигранти, едниот од Пакистан, а другиот од Шри Ланка се случи на 25 јуни годинава. Во несреќата беа повредени уште 17 мигранти, а возачот избега.
Во ОЈО велат дека случајот е во надлежност на Основното јавно обвинителство за гонење на организиран криминал и корупција и е во фаза на истражна постапка.