Иако МВР го знае нивниот идентитет, по обдукцијата тие биле заведени како непознати лица и во АД Бутел не дозволуваат да се погребаат се додека не ги идентификуваат нивните роднини
Телата на двајцата мигранти кои загинаа во сообраќајна несреќа пред два и пол месеци на патот Радовиш-Штип, се наоѓаат во капелата во Бутел. Но, иако МВР го знае нивниот идентитет, по обдукцијата тие биле заведени како непознати лица.
Од АД Бутел за НОВА потврдија дека телата се во капелата, но велат дека од таму никој не може да ги подигне бидејќи не се идентификувани.
„Телата се тука во капелата два ипол месеца, не се погребани. Потребно е да дојдат нивните роднини и да го потврдат нивниот идентитет“,велат во АД Бутел.
Од невладината Легис кои два и пол месеца трагаат по телата по институциите, потенцираат дека роднинините не се веќе во државата, заминати се одамна во некоја од европските земји и нема да можат да дојдат.
„Загинатите имаа кај себе лични документи кои по обдукцијата заедно со облеката им беа предадени на роднините“, велат во Легис.
Во МВР за НОВА потврдија дека е познат идентитетот на двајцата загинати, кои животот го загубија на 25.06.2018 година во 16,15 часот на магистралниот пат Радовиш – Штип, во близина на рудникот Бучим,кога товарно возило „Ивеко“ со скопски регистарски ознаки, во кое биле превезувани мигранти излетало од коловозот и удрило во заштитна метална ограда од мост.
„Во несреќата на местото на настанот од страна на мртвопроверител од Здравствена установа Радовиш констатирана е смрт на две лица и тоа: С.А.Р. од Бангладеш чиј идентитет е утврден по пронајдена лична карта и другото лице С.А. – име кое е утврдено по кажување на еден од мигрантите, кој не бил брат на починатиот. Увидот на местото на настанот е извршен од страна ОЈО-Радовиш во содејство на Полициска станица Радовиш, Надворешната канцеларија за криминалистички работи Радовиш и Регионален центар Исток“, се вели во одговорот на МВР.
Од МВР потенцираат дека од страна на Полициска станица во Радовиш целокупниот материјал со Известување се доставени до Основно јавно обвинителство во Радовиш.
„Бидејќи станува збор за мигранти истрагата е преземена од страна на ОЈО за гонење на Организиран криминал, а обдукција во Институтот за Судска медицина се врши по наредба на Јавен обвинител, по што извештај се доставува до нив“, велат од МВР.
Нема одговор од ОЈО зошто не била доставена службена белешка во Институот за Судска медицина, по што во Судска ги завеле како НН, односно непознати лица.
„Телата се обдуцирани кај нас на 26 јуни еден ден по несреќата, земена е ДНК по што се заведени како НН- непознати лица. Ова е направено така бидејќи од МВР не добивме службена белешка дека се идентификувани“, изјави пред два дена, Станков за НОВА.
Дали службената белешка ја доставува ОЈО или МВР и зошто не била доставена, останува да разјаснат овие две институции.
Додека не се расчисти целата оваа ситуација и да се најде евентуалниот пропуст, телата на загинатите ќе бидат во капелата. Тоа секако изискува големи финансиски трошоци што очигледно роднините нема да можат да ги платат.
Загинатите мигранти се млади луѓе едниот од Бангладеш, а другиот од Шри Ланка.
Од МВР велат дека е поднесена кривична пријава против неколку лица кои го организирале транспортот на мигрантите. Во сообраќајната несреќа покрај двајцата загинати уште 17 други мигранти беа повредени.