Пратеници од првиот парламентарен состав на независна Македонија денеска ги повикаа граѓаните да излезат да гласаат „За„ на референдумот во недела.
„Ние ги удривме темелите на нашата независност и сега Ве повикуваме да направиме уште еден вистински чекор во вистинско време“ кажа Алил Џаферовски во име на 30 пратениците од првиот парламентарен состав кои ја изгласаа Декларацијата за независност, Декларацијата за членство во НАТО и ЕУ, ја донеса одлуката за рефрендумот во 91 и го донесоа Уставот на Македонија.
Може да не ги сакате Заев, Мицкоски или Ахмети, но Македонија мора да се сака и затоа треба да се излезе на референдумот и да се гласа „За“.
„Во 1993 приемот на Македонија во Обединетите нации беше условен со прифаќање на спогодбата со Р. Грција и мислиме дека не погрешивме. Тогаш исто можевме да кажеме дека сакаме во ОН, но без референцата ФИРОМ, меѓутоа каде ќе бевме сега. Денеска нашето членство во НАТО и ЕУ повторно е условено со прифаќање на уште една спогодба со Грција. Мислиме дека ако го направиме истото, нема да погрешиме. Ние веруваме дека вистинска одлука на 30 септември е да се излезе на рефрендумот и да се гласа „За“ пишува во изјавата на која се потпишани 30 пратеници од првиот парламентарен состав.
Првиот претседател на Собранието Стојан Андов рече дека за евроатлантската интеграција има единство меѓу Македонците и Албанците.
„Многу тешко се градеше единството и меѓу Македонците и со Албанците и со помалите етнички заедници и тоа скапо го плативме, имаше и жртви. Денес во Македонија има формално единство меѓу Македонците и Албанците и другите етнички заедници околу евроатланската интеграција и зачленувањето во ЕУ и НАТО. Сите други филозифии се само обиди да се разбие тоа единство“ кажа Андов.
Михаил Пановски кој беше пратеник од редовите на ВМРО ДПМНЕ повика да се излезе на гласање затоа што „подобар Договор никогаш нема да се постигне“.
„Мојата мајка во војната во Егејска Македонија ги загуби и братот и сестрата. Нема да дојде таму друг премиер како Ципрас кој е воспитуван во демократски дух. Затоа ви тврдам дека подобар договор од овој никогаш нема да добиеме“ кажа Пановски.
Мухамед Халили пратеник од ПДП зборуваше за причините зошто Албанците го бојкотираа рефереднумот за независност.
„Не излеговме на гласање затоа што структури во ВМРО ДПМНЕ беа против рамноправност на народите и затоа не го гласавме Уставот. Но тоа го корегиравме во 2001година. Сега е време и покрај сите разлики да излеземе на референдум“ кажа Халими.
Ѓулистана Марковска пратеник од редовите на ВМРО ДПНМЕ побара од партиските лидерства да бидат визионери .
„Како некогашни визионери и сега визионерството го гледаме во тоа што Република Македонија ќе стане членка на НАТО и на ЕУ. Единствен начин е преку Договорот“ кажа Марковска.