Немате двотретинско мнозинство за промена на Уставот, а вие само продолжете со процесот – кажа пратеникот од ВМРО ДПМНЕ Трајко Вељаноски на Комисијата за уставни прашања во Собранието на која се дебатира за уставните измени.
„Мнозинската волја на народот која беше изразена преку неизлегување на референдумот е императив за секој пратеник. Немам мандат да го менувам Уставот, затоа што е спротивно на рефрендусмката одлука“, кажа Вељаноски по што следуваше аплауз од пратениците од ВМРО ДПМНЕ.
Претходно, Вељаноски наведе дека опозицијата, академската јавност и претседателот на државата биле исклучени од преговорите кои како национален интерес ги претставил како што рече „тесен круг политичари“.
„Наместо јавно дебати се водеа тајни преговори, наместо консензус и обдеинување договорот доведе до поголема поделеност на општеството“, рече Вељаноски.
Тој исто така обвини дека на власта им бил поважен тајмингот за Договорот, од колку содржината.
Премиерот Зоран Заев, кој го образложи предлогот на Владата, рече дека нема ништо спорно во предлогот за уставни измени и ги повика пратенииците да не подлежат на притисоци и да се обединат околу стратешките цели на земјата.
„Со оваа одлука референцата ФИРОМ , ќе ја испратиме во историјата“, кажа Заев и додаде дека со Договорот се заштитува македонскиот идентитет за век и векови, а македонскиот јазик станува признат и од Грција.
„Нашиот влог е прецизирано име – Република Северна Македонија“, рече Заев.
За стручната и експертска јавност, оцени тој, измените се согласно меѓународните стандарди.
„Оваа иницијатива се покренува во согласност со законите и институционалните постапки“, рече Заев кој потенцираше дека пратениците се тие кои треба да ја одредат иднината на граѓаните кон НАТО и ЕУ и дека треба да се изјаснат по своја волја. Сега е време сите што се за НАТО и ЕУ да ги поддржат измените“, рече премиерот.
Расправата во собраниската Комисија за уставни прашања може да трае десет дена.