Претседателот на опозициската ВМРО ДПМНЕ Христијан Мицкоски во интервју за МКД.мк вели дека во контекст на рационализација на трошоците во партијата размуслуваат и за продажба на зградата, во јавноста позната и како Бела палата.
– Размислуваме за рационализација на трошоците во партијата. Ако имаме соодветна понуда, објектот на штабот на партијата би го продале или би го изнајмувале доколку има соодветна понуда. Сега правиме еден вид на скенирање на пазарот, па ќе видиме, вели Мицкоски во интервјуто за порталот.
На прашањето дали по исклучувањето на Сашо Мијалков од партијата, прекинатите комуникации со Никола Груевски, дали ова симболично значи и некакво раскрстување со начинот на делување на поранешното партиско раководство, Мицкоски потврдува дека „може да има и некаква симболика во сето тоа“.
Мицкоски вели дека со Груевски немал никаков контакт веќе подолго време, но по денешната информација за негово упатување на издржување на затворска казна, вели дека сака да се види со него, „да поразговарам и да видиме како може да помогнеме против овој политички прогон што се случува“.
За тоа како ќе дејствуваат во врска со уставните измени, Мицкоски најавува дека „ВМРО-ДПМНЕ ќе продолжи да биде гласен критичар на власта“.
-Немаме намера да отстапиме, или да влегуваме во нивните стапици на разно-разни комисии за некакво лажно помирување додека невини луѓе гнијат по затворите и се водат десетици судски процеси или истраги против стотици други. Едноставно, сега најдоа пратеници кои не издржаа, па им текна на помирување. Не оди тоа така, и ако се надеваат на селективна правда, таква неправда ние нема да поддржиме….Што се однесува до партискиот живот и динамика ВМРО-ДПМНЕ врши комуникации со големи општествени групи и поединци и ќе се посветиме на окрупнување на линијата против ова заедничко зло претставено од владата предводена од СДСМ, вели Мицкоски за МКД.мк и најавува дека наредната недела планираат воспоставување на советот на Извршниот комитет на партијата кој ќе биде составен во голема мера од нови ликови, професионалци од различни области, професори, доктори на науки, аналитичари и експерти кои, како што вели ќе ги скенираат сите проблеми и области и ќе нудат решенија на ИК на партијата.