Published: Monday, October 29, 2018 15:32
Пратеничката група на ВМРО ДПМНЕ до Собранието достави предлог закон за амнестија со кој бара да се ослободат од кривично гонење сите осомничени, обвинети и осудени лица за настаните во Собранието од 27 април.
Со законот што се предлага да биде усвоен по скратена постапка се предвидува „бришење на осудите и да се укинат правните последица на осудените“.
Координаторот на пратеничката група на ВМРО ДПМНЕ Драган Данев не презцизираше колкав е бројот на лицата на кои ќе се однесува амнестијата, но додаде дека со законот се бара амнестирање и за пратениците кои партијата ги исклучи од своите редови.
Како што прецизираше Данев, со законот се бара да се ослободат од кривично гонење сите „осомничени и обвинети за кои постои основано сомнение дека сториле кривично дело согласно член 384 – „Учество во толпа што ќе спречи службено лице за вршење на службено дејствие“, согласно член 386 за „Насилство“, член 385 – „ Учество во толпа што ќе изврши кривично дело и за кривичното дело согласно член 313 – „ Терористичко загрозување на уставниот поредок и безедноста од Кривичниот законик“ .
Исто така, со законот се бара да се укинат веќе донесените пресуди.
-Игор Дурловски, Владо Јовановски, Богдан Илиевски и Борис Дамовски не се терористи. Не се терористи ниту вработениет во МВР, ниту останатите лица прогонувани врз основа на случувањата од 27 април. Тоа го знаеме ние, тоа го знаете вие колеги од власта, а тоа го знае и целата македонска јавност. Затоа почитувани од СДСМ, бидете искрени и застанете еднаш зад она што го говорите, а кое е подадена рака и од нас за помирување, кажа Данев.
Како што рече Данев, предлог законот „обезбедува правда за сите и вистинско национално помирување, наместо селективност“.
-Целта е национално помирување и враќање на нормалните текови во државата, кажа Данев.