Поднесено е обвинение против претседателот на Државната агенција за Бугари во странство, Петар Харалампиев дека како шеф на организирана криминална група заедно со уште 20 лица земале мито за издавање на бугарски пасоши на лица кои не ги исполнувале условите. Меѓу обвинетитети е и генералниот секретар на Агенцијата.
Полицијата уапси 22 лица осомничени дека фалсификувале документи со кои Македонци, Украинци и Молдавци ваделе бугарски пасоши, информираат тамошните медиуми.
Според обвинението, групата организирала издавање на документи за бугарско потекло, без лицата реално да ги исполнуваат условите за тоа. Потоа, со овие сертификати била олеснета процедурата за добивање на бугарско државјанство во Министерството за правда.
Истрагата утврдила дека целата постапка се одвивала преку посредници во Ќустендил и Плевен кои контактирале со граѓаните на Молдавија, Украина и Македонија кои плаќале по 5000 евра за да добијат лажни сертификати за бугарско потекло. Неделно биле издавани околу 40 сертификати. Во акцијата полицијата одзела пет компјутери со официјални информации, како и документи.
Катја Матева, поранешен претседател на Одделот за државјанство во бугарското Министерството за правда изјавила дека околу 60 барања за државјанство буле одбиени, откако Интерпол ги предупредил дека против апликантите има распишано потерници.
Портпаролот на Европската комисија, Кристијан Виганд не ја коментираше истрагата, но потсети дека комисијата подготвува извештај за измами во многу земји-членки кога станува збор за доделување на државјанства на инвеститори, односно за т.н. “златни пасоши”.




