Жителите на француската пацифичка територија Нова Каледонија излегоа на референдум, за тоа дали да останат дел од Франција или да станат независни.
Гласањето беше ветување во договорот пред две децении по насилната кампања на сепаратистите од домородците Канак.
Групите за независност ги повикаа гласачите на Канак да ги отфрлат “оковите на колонијалните власти”, но сепак, анкетите покажуваат дека мнозинството гласачи ќе ја отфрлат независноста.
Околу 175.000 луѓе имаат право на гласа на територијата, која се наоѓа источно од Австралија. Припадниците на Канак сочинуваат помалку од 50% од електоратот.
До пладне, процентот на излезност е 41,8% во споредба со 27,3% во истото време на локалните избори во 2014 година.
Профил на Нова Каледонија
Оддалечените острови секоја година добиваат околу 1,3 милијарди евра од француската влада.
Нова Каледонија е богата со никел, што се смета за клучна компонента во производството на електроника, а Франција ја смета за стратешко политичко и економско средство во регионот.
Францускиот претседател Емануел Макрон најави телевизиско обраќање по резултатите што се очекуваат околу 23 часот по локално време (12:00 средно европско време).
За време на посетата на главниот град, Нумеа, во мај, Макрон рече дека Франција ќе биде “помалку убава без Нова Каледонија”.
Гласачите денеска одговараат на прашањето: “Дали сакате Нова Каледонија да стекне целосен суверенитет и да стане независна?”
Според условите од договорот од 1998 година, во случај резултатот на овој референдум да биде “не”, можат да се одржат уште два референдума пред 2022 година.
Ако резултатот биде “да” тоа ќе биде првата француска територија што ќе се отцепи, по Џибути (во 1977) и Вануату (во 1980).
Нова Каледонија е застапена во францускиот Парламент од двајца заменици и двајца сенатори.
Има конгрес кој избира извршен директор со овластувања за некои области на политиката – како полиција, образование и локална самоуправа.
Франција ги окупирала островите во 1853 година и на времето ги користела како казнена колонија.
Во 80-тите додје со судири меѓу француските сили и припадниците на домородното племе Канак.
Кулминацијата на тој конфликт беше кога сепаратистите на Канак зедоа група француски жандарми како заложници кои ги држеа во пештера. Во Францускиот напад што следеше загинаа 19 припадници на Канак и двајца војници.