Министерството за здравство се огласи за случајот со пациентот кој почина од пулмонална хипертензија и не дочека да почне со терапијата. Соопштението го пренесуваме во целост.
„Министерството за здравство, преку Здружението „Момент плус“, беше информирано за состојбата на пациентот, кој на наше големо жалење, пред неколку денови почина од пулмонална хипертензија.
Иако за пациентот, Министерот Доц. д-р Венко Филипче, обезбеди лекови, за жал поради неговата предходно влошена здравствена состојба, тој воопшто не дошол да ја прими терапијата и починал.
Напоменуваме дека пациентот не боледувал исклучиво од пулмонална хипертензија, која ја сметаме за ретка болест и за оваа болест Министерството ги има обезбедено сите лекови кои се потребни за третман и лекување, туку таа била само последица од неговите примарни кардиолошки заболувања.
Во моментов во Македонија има 6 (шест) пациенти со ваква ретка болест и за сите нив се обезбедени терапиите кои им се неопходни. За сите пациенти кои ја добиваат оваа болест како последица од други заболувања, овие лекови ќе бидат достапни на позитивната листа. Kако што веќе граѓаните се информирани, измените на позитивната листа на лекови е се во тек и се во Собраниска процедура“, се вели во соопштението од Министерството за здравство.
За разлика, од Министерството каде велат дека пациентот не дошол да ја подигне терапијата, која ја обебзедил министерот Филипче, од Здужението „Момент плус“ вчера за НОВА изјавија дека не била тука лекарката која требала да потпише за во аптека да му го дадат лекот кој му бил одобрен откако интервенирале кај министерот Филипче.
На овој човек не му следувала терапија бидејќи неговата болест била секундарна, односно имал и други дијагнози освен оваа и затоа се интервенирало кај Филипче.
Како што објави НОВА, пациент со пулмонална хипертензија починал пред да ја дочека неопходната терапија која му била ветена за понеделник(утре). 70 годишниот скопјанец бил остваен без лекови откако пред една година му била регистрирана болеста.
Пациентот кој не го дочекал лекот досега го купувал со свои средства, кога бил во можност, а неговата цена изнесува околу 500 евра месечно.
Според податоците од Здружението „Момент плус“, во државата има десеттина пациенти со ова ретко заболување, а нивниот број е констанен бидејќи како што се појавуваат нови случаи, така од веќе дијагностицираните по 2-3- ца умираат.
Само половината од овие пациенти ја примаат неопходната комбинирана терапија на товар на државата. Другата половина на кои болеста им е секунадарна, лекови не им следуваат.