Министерката за труд Мила Цароска денеска на прес конференција кажа дека на 12.000 осигуреници им била направена „скандалозна неправда“ затоа што не им биле префрлени придонеси во вториот – приватен столб на пензискиот систем. Ова било утврдено по направената анализа на пензискиот систем од страна на Меѓународни финансиски институции .
„Она што го откривме е дека за околу 12.000 осигуреници уплатените придонеси останале само во државниот пензиски столб, односно за нив воопшто не се распределувале средства во приватниот (втор) столб, иако ги исполнувале законските услови за ова. На овој начин директно им се скратува правото на овие луѓе да остварат пензија во целост. На пример, за осигуреник со просечна плата во период од 2007 до 2018 година вкупно остануваат нераспределени околу 295 илјади денари придонес во вториот пензиски столб. Односно, изгубени се околу 95 илјади денари добивка од инвестирање на индивидуална сметка со што ние ќе ги обештетиме со околу 400 илјади денари по корисник“, рече Царовска.
Од Буџетот се обезбедени 19 милиони евра и овие осигуреници ќе бидат обештетени, преку префрлање на овие пари на приватните пензиските друштва.
Цароска најави дека документите кои биле дел од анализата ќе бидат предадени на Основното јавно обвинителство на понатамошна истрага.
Цароска кажа и дека за десет години во Фондот за ПИОМ е направена дупка од 15 милијарди денари, поради како што рече „ погрешните политики на претходната Влада и ад хок покачувања на пензии надвор од законската рамка“.
„Од 1 јануари 2019 година стапија на сила пакетот на закони со кои ја менуваме структурата на двостолбниот пензиски систем и придонесуваме за намалување на овој дефицит “ рече Цароска, а целта е да се обезбеди стабилна исплата и континуиран раст на пензиите, без при тоа да се замрзнуваат или да се зголемува старосната граница за пензионирање.