Published: Wednesday, January 30, 2019 15:45
Врховниот суд одлучи дека Специјалното јавно обвинителство повеќе не смее да води истраги и да покренува обвиненија, затоа што поминал рокот од 18 месеци откако ги добиле прислушуваните разговори.
Врховните судии одлучуваа по иницијатива на адвокатите Боро Тасевски и Еленко Миланов кои бараа од Судот да се произнесе до кога СЈО може да покренува истраги.
„Јавното обвинителство за гонење на кривични дела поврзани и кои произлегуваат од содржината на незаконското следење на комуникациите може да покрене обвинение или да нареди запирање на истражната постапка во период не подолг од 18 месеци од денот на преземањето на предметите и материјалите од негова надлежност, како кумулативен услов, кој не може да биде пречекорен сметано од денот на прием на материјалите од неовластено следење на комуникации од член 2 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, и по истекот на тој рок од 18 месеци, не е овластен тужител за преземање на јавнообвинителски работи на предистражни и истражни дејствија, предвидени со Законот за кривичната постапка, се наведува во правното мислење објавено на веб страницата на Врховниот суд на РМ по одржаната општа седница.
Ова значи дека Врховниот суд одлучил дека СЈО имал рок да покренува истраги и обвиненија до јуни 2017 година, кога поминале 18 месеци од денот кога беа предадени прислушуваните разговори во СЈО, односно од 30 декември 2015 година.
Адвокатите кои ја поднесоа ваквата иницијатива за НОВА изјавија дека „со одлуката на Врховен се потврди тезата на одбраната дека не можат да покренуваат истраги, ниту можат да покренуваат обвиненија затоа што се поминати повеќе од 18 месеци од прибавувањето на незаконски прислушуваните разговори“.
Со ваквото мислење на Врховниот суд станува неизвесна завршницата на 18 слуачи кои СЈО ги покрена по јули 2017 година – меѓу кои се Талир за незаконското финансирање на ВМРО ДПМНЕ, „Империја“, „Попис“, „Лидери“, „Пациент“ каде меѓу осомничените е Бујар Османи како поранешен министер за здравство, „Моќник“ против Антонио Милошоски, „Хармонија“ во која се опфатени Никола Груевски, Миле Јанакиески и Стевчо Јакимовски.