Европската федерација на новинари (EFJ) денеска ја осуди одлуката на судот во Македонија, според која, новинарот Томислав Кежаровски следните 4 и пол години ќе треба да „ги помине“ во затвор.
„Одлуката и нејзината брутална имплементација се крајно не прифатливи и згрозувачки“, изјави генералниот секретар на „EFJ“ Рикардо Гутиерез. „Кежаровски не направи ништо погрешно туку само ја извршуваше својата улога како новинар кој известува во јавен интерес“.
Оттаму бараат итна жалба на пресудата, која според нив, се противи на европските закони за слобода на изразување.
„На новинарите мора да им се дозволи да ја работата својата истражувачка работа, ослободени од закана за затворска казна, без да бидат присилени да ги откријат своите извори“, потенцираше Гутиерез.
Европската федерација на новинари неколку пати реагираше на продолжувањето на притворот на Кежаровски.
И покрај реакциите на многубројни меѓународни и домашни организации, судот остана „глув“, и денеска на новинарот Томислав Кежаровски му изрече казна од 4 и пол години затвор за случајот „Ликвидација“ кој траеше 2 месеци.