Ургентно решение за надминување на проблемот со непотизам при вработувањата е веднаш да се повлечат и вработените кои се блиски на функционерите од сегашната, но и од поранешната власт, кажа денеска министерот за информатичко општество и администрација Дамјан Манчевски на прес конференција за новиот Закон за инспекциски надѕор.
„Ги повикувам сите и од власта и од опозицијата, нагласувам и многуте илјадници од опозицијата. Сите податоци, и за едните и за другите, ќе ги доставиме до Државната комисија за спречување на корупцијата“ рече Манчевски.
Ние во јавноста години наназад реагиравме и дававме информации за блиски луѓе и роднини на сегашната опозиција, а тогашна власта. Да бидам искрен јавноста претходно не беше толку гласна и немаше никаква реакција од тогашните функционери. Оттогаш помина време, ниту тие преземаа чекор, ниту Државната комисија за спречување на корупција која постоеше тогаш, па едно време не постоешено. Но, сега постои и се надевам дека конечно ќе преземе чекори, ќе ги види сите реални настапи во кои сме давале конкретни примери, но и ќе ги доставиме повторно ако треба, и оти ќе си преземе чекори за сите подеднакво, рече Манчевски.
Со законот за високораководна служба што е во подготовка треба да се промени начинот за избор на лицата на високите позиции во администрацијата со вклученост на граѓанскиот сектор и универзитеите во комисиите кои ќе вршат избор и бодување на кандидатите.
– Да бидам искрен, проблемот е таму, во раководната служба, ако раководителот не се согласи на нешто нема да се случи и нема да може да се врши притисок. Почнуваме од врвот и овој принцип ќе следи и понатаму, рече министерот Манчевски.
По реакциите во јавноста од работните места се повлекоа дедото на Александар Кирацовски, мајката на портпаролот на СДСМ Костадин Костадиновски која беше вработена во Централен регистер и синот на пратеникот Горан Мисовски.
Нема информација дали од ќе се повлечат и блиските роднини на пратеничките на СДСМ Мира Стојчевска и Милева Ѓорѓиева. Стојчевска и Ѓорѓиева не одговораат на телефонските повици и на пораките.
Синот на Стојчевска е вработен во ЕЛЕМ,а братот во РЕК Битола. Синот на Ѓорѓиева е вработен како инспектор за јавна безбедност, снаата во општина Радовиш на неопределно време, а братот како педагог во ОУ „Атанас Нивичански“.
Од ДУИ засега молк за темата непотизам, иако во јавноста се открија и случаи на нептоизам поврзани со блсики роднини на нивни функционери.
Министерот за економија Крешник Бектеши кажа дека нема да побара од неговата сестра да го напушти работното место во АД МЕПСО, бидејќи, како што рече, не е вработена во Министерството за економија, полнолетна е, не живее со него, мажена е и сама одлучува за својот живот.
Во АД ЕЛЕМ е вработена и Нертила Усеини Каба, сопругата за братот на сопругата на Бектеши.
На списокот на сомнителни партиски вработувања за кои Антикорупциската комисија соопшти дека ќе ги итсражи се и вработувањето во ЕЛЕМ на сестрата на министерот за култура Асаф Адеми, кој е од партијата „Алтернатива“, на ќерката на претседателот на Собранието Талат Џафери во ЕЛЕМ, вработувањата во училишта на сопругата на градоначалникот на Општина Берово Звонко Пежевски, на сопругата на градоначалникот на Општина Неготино, вработувањето во МВР на сопругата на пратеникот Зеќир Рамчиловиќ.