Стефанија Чакаровска, ќерка на Гоце Чакаровски кој е советник за здравство на премиерот Заев од пред една недела работи како секретарка-советник на заменик директорот во Агенцијата за лекови, Роберт Бекировски, дознава НОВА од свои извори.
Информацијата ја потврди и раководството на Агенцијата за лекови (МАЛМЕД). Чакаровска на ова работна место е со договор на дело, со оглед на тоа што се стопирани сите конкурси заради претседателските избори.
Извори за НОВА од Агенцијата велат за вакво работно место воопшто немало потреба, а нејзиното вработување било побарано од „горе“.
Роберт Бекировски кој сега е нејзин претпоставен, а претходно ја извршуваше функцијата директор на МАЛМЕД, беше разрешен партиски , а местото припадна на Алтернатива. Бекировски кој е кадровик на СДСМ пред еден месец започна да ја извршува функцијата заменик директор, откако претходно, како што објави НОВА, беше сменет Законот за лекови, со што се отвори законска можност за именување на заменик директор во Агенцијата за лекови и во пакет со останатите јавни претпријатија и оваа институција доби заменик директор.
Нашите извори велат дека во МАЛМЕД немаат реална потреба од заменик директор, а не пак од негов советник или секретарка.
Гоце Чакаровски, советникот на Заев за здравство, вели дека неговата ќерка работи по договор на дело само на неколку месеци, а потоа ќе се повлече и ќе се врати во Словенија каде што студира.
„ Не се работи за непотизам. Мојата ќерка заради „икс“ причини се врати на неколку месеци во државата и потоа ќе се врати пак во Словенија каде што студира. Работи по договор на дело во МАЛМЕД, не е во редовен работен однос“, изјави за НОВА, Чакаровски.
Покрај Чакаровска во МАЛМЕД е примен и еден шофер, информатичар, архивар, еден фармацевт(иако како што велат, имало потреба од двајца), но во Агенцијата тврдат дека за нив имало реална потреба, а ќе биде распишан конкурс за редовен работен однос веднаш штом за тоа се создадат услови.