Поранешниот директор на Агенцијата за лекови(МАЛМЕД), Роберт Бекировски не работи веќе таму, откако во петокот минатата недела му завршил договорот, дознава НОВА. Бекировски по назначувањето на новиот директор Ќахил Ибраими стана негов советник, но бидејќи не му бил продолжен Договорот на дело, тој си заминал од Агенцијата.
Бекировски е човекот за кој се шпекулира, дека заради него специјално се менува Законот за лекови, со што ќе се отвори законска можност за именување на заменик директор во Агенцијата за лекови. Како што стои во Предлог законот за лекови во „случај на отсуство на директорот од работа (користење годишен одмор, боледување, службени отсуства и др.) заменикот би го менувал бидејќи „се доведува во прашање ефикасноста во извршувањето на работите кои се во надлежност на директорот, што се одразува и на вкупното функционирање на Агенцијата за лекови.
Подносител на барањето за измени на законската регулатива е Министерството за здравство, а Законот откако во септември беше ставен на Енер на Влада, сега чека на второ читање во Собрание.
Но, процедурата со законските измени се одолжи, така што и канцеларијата која Бекировски си ја средил за себе, со месеци порано сега е празна.
Во фармацевтските кругови со месеци се зборуваше како Бекировски заградил дел од салата за состаноци и направил просторија каде ќе работат Комисиите, а другиот дел си го средил за себе. Тој си ги земал и теписите во својата канцеларија која ја средил поубаво од директорската. Сето тоа се правело додека не бил назначен новиот директор, Ибраими.
НОВА дојде до фотографии на кои се гледа неговата убаво средена канцеларија која сега е празна, а на бирото стои негова слика заедно со премиерот Заев.
За сметка на тоа, канцеларијата на новиот директор на подот нема теписи, а канцеларијата која била преградена со sид нема прозорци поради што членовите од Комисиите кои одлучуваат за лековите, не сакале да доаѓаат таму. Оваа информација ја потврди и новиот директор Ќахил Ибраими, кој рече му дал рок на Бекировски да ги урне зидовите и работите да ги врати првобитната состојба.
„Да, точно е. Членовите од Комисиите не сакаа да доаѓаат на состаноци бидејќи се гушеа, тука немаше воздух за дишење бидејќи просторијата која ја преградил нема прозорци. Јас му дадов рок од 3 недели да го урне sидот и да ги врати работите како што биле, што тој го стори“, изјави за НОВА, Ибраими.
Сега просторијата е вратена во нормала, но на sидот се уште стојат траги од “градбата“, на Бекировски.
Инаку, за спроведување на Законот за лекови, како што стои во образложението, потребни се дополнителни финансиски средства од Буџетот на Република Македонија за обезбедување на плата и други надоместоци за заменик на директорот на годишно ниво од 802.000 денари. Тоа значи дека платата на заменик директорот месечно ќе изнесува 1100 евра.
Во Агенцијата за лекови досега немало заменик директор. Извори од таму велат дека нема потреба за заменик бидејќи и да патува директорот на неколку дена, процедурите кои што ги врши, се долготрајни и не изискуваат никаква итност.
Згора на се, Законот за организација и работа на органите на државната управа во член 52, став 3 и 4, а и во самиот Закон за лекови предвидено е во отсуство на директорот тој да може избере заменик од редот на вработените.