Одлуката на собранискиот спикер Талат Џафери да ја прекине седницата на која требаше да се гласа за одземање на имунитетот на пратеникот Трајко Вељановски ги налути партнерите во владината коалиција. Пратениците на СДСМ денеска не присуствуваа на координацијата кај претседателот на Собранието, по што тој ги одложи сите седници кои беа закажани за денеска.
По бурниот и тензичен викенд кој финишираше без гласање за одземање на имунитетот на пратеникот, денеска владините партнери се обвинија меѓу себе за тајни преговори со ВМРО ДПМНЕ.
Претседателот на Собранието Талат Џафери рече дека седницата ја прекинал поради однесувањето на пратеникот Мухамед Зеќири кој дофрлал од место.
Собранието имаше рок до полноќ да гласа и да му го одземе имунитетот на Велјановски, а ситуацијата за која зборува Џафери се случуваше по 23 часот и 58 минути.
„Седницата е прекината затоа што одмина времето предвидено за носење одлука до 24.00 часот. Седницата е прекината поради однесувањето на пратениците, а посебно на пратеникот од мнозинството Мухамед Зекири. Што кажа, како кажа, мислам дека не е местото јас да повторувам. Во таква ситуација, обврска моја е да ја прекинам седницата“, изјави Џафери.
„Вооопшто немаше ситуација која наликуваше на потреба да се прекине седницата. Во ниту еден момент немаше навреди кон него. Талат Џафери е искусен и успевал да изменаџира многу подраматични ситуации во Собранието. Прашање е дали Џафери свесно одработи за ВМРО ДПМНЕ, односно, за Трајко Вељаноски да не се соочи со правдата, рече Зекири.
Собранискиот спикер доби поддршка од неговата партија, а ВМРО ДПМНЕ денеска одлучи да молчи.
„ДУИ целосно го поддржува владеењето на правото, без никакви етнички и било какви влијанија. Сите пртеници на ДУИ беа присутни, од претседателот Ахмети па до болниот Шаќири за да гласаме за одземање на имунитетот на Вељановски. Но, пратениците не успеаја да се воздржат кон коментарите на претседателот. Ништо немаше да се случи доколку претседателот на Комисијата за деловнички и мандатно-имунитетни прашања ја ставеше одлуката на гласање во 23 часот како бевме договорени. Ништо немаше да се случи доколку претседателот а Комисијата за деловнички и мандатно-имунитетни прашања не се договореше со ВМРО-ДПМНЕ да ја стави одлуката во 21 часот, без да не информира и да не почека. Ништо од тоа немаше да се случи доколку некој од пратениците не станеа и не го нападнаа со погрдни зборови претседателот на Собранието“, рече Груби, притоа додавајќи дека нема никаква криза во владеачката коалиција.
Претседателот на Комисијата за мандатно – имунитетни прашања Павле Богоевски обелодени дека во саботата кога истекувал рокот да се гласа во Комисијата, на пратеникот на ДУИ му се слошило, а неговата заменичка не се јавувала на телефон.
„ Три пати и ѕвонев на пратеничката Мирсада Емини Асани која е заменик член од ДУИ. Два пати не ми крена телефон, третиот пат ми крена најверојатно по грешка, молчеше 12 секунди и ја прекина врската.
Да престанете да лажете и да ја манипулирате јавноста. Единствена вина за заштитата на Трајко Вељаноски е кај Талат Џафери и ДУИ“ рече Богоевски.
Членовите на Комисијата за мандатно – имунитетни прашања гласаа во саботата – 4 пратеници од СДСМ гласаа „за“, а четворица пратеници од ВМРО ДПМНЕ гласаа „против“, што отвори дилема кај спикерот Џафери дали воопшто треба да свикува седница. Седницата ја свика дури во 21 часот – и пратениците до полноќ беа повеќе на пауза отколку во сала. Во 23 часот и 45 минути седницата продолжи, но по барање на пратеничката група на ВМРО ДПМНЕ, Џафери даде пауза. Повторно се собраа дури во 23 часот и 58 минути кога Џафери му даде збор на координаторот на пратеничката група на ВМРО ДМНЕ Никола Мицевски.
Две минути по полноќ, Џафери ја прекина седницата, со што на пратеникот Велјановски не му беше одзеден имунитетот и Судот не може да му одреди притвор.
Обвинителството за организиран криминал го сомничи Велјановски како организатор за настаните од 27 април, кога по изборот на Талат Џафери за претседател на Собранието следуваше упад во зградата на Парламентот и десетина пратеници беа нападнати и претепани.