ОН денеска го одбележуваат својот ден, 24 октомври, во знак на сеќавање на усвојување на Повелбата на светската организација, која стапи во сила на денешен ден во 1945 година.
Повелбата беше ратификувана од поголемиот број тогашни земји-членки на ОН, меѓу кои и петте постојани: В. Британија, Кина, Русија, САД и Франција.
Обединетите Нации официјално постојат 68 години.
Денот на ОН се слави од 1948 година, а Генералното собрание на ОН во 1971 година им препорача на земјите-членки да го одбележуваат 24 октомври како празник на своите територии.
По повод 24 октомври, генералниот секретар на Светската организација Бан Ки-мун изјави дека „ОН придонесуваат за мирот и општиот развој“.
Тој посочи дека судирот во Сирија е најголем безбедносен предизвик за светот, додавајќи дека милиони луѓе зависат од хуманитарната помош на ОН.
– Експертите на ОН заедно со претставниците на Организацијата за забрана на хемиското оружје работат на уништување на резервите што ги поседува Сирија и ние се залагаме за дипломатско решение за да се стави крај на страдањето на луѓето, кое долго трае, наведе Бан ки Мун.
ОН при нивното формирање имаше 51 земја-членка, а денеска 193.
Покрај седиштето во Њујорк, Организацијата свои претставништва има и во Женева, во Виена и во Најроби.
Советот за безбедност, како највлијателно тело има 15 членки, од кои пет постојани – Кина, Франција, САД, Русија и Велика Британија и 10 ротирачки со двегодишен мандат кој секогаш почнува на 1 јануари.
Бан ки Мун за генерален секретар е избран на 1 јануари 2007 година, а во 2011 година е реизбран. Тој ќе раководи со Светскатра организација до крајот на 2016 година.