Жалбениот совет на Меѓународниот резидуален механизам за кривични судови (наследник на Хашкиот трибунал) денеска, по три години жалбена постапка, ќе ја изрече второстепената пресуда за поранешниот лидер на босанските Срби, Радован Караџиќ.
Изрекувањето на правосилната пресуда, по жалбите на обвинетиот за воени злосторства Радован Караџиќ, е закажано за 14 часот, а медиумите ќе го пренесуваат со задоцнување од 30 минути, односно во 14,30 часот.
Судскиот совет на Хашкиот трибунал во март 2016 година го осуди Караџиќ на 40 години затвор за геноцид во Сребреница и злосторства извршени против човештвото во Босна и Херцеговина од 1992 до 1995 година.
Караџиќ беше уапсен во Белград на 21 јули 2008 година, а девет дена подоцна беше екстрадиран во Хаг.
Тој долги години се криеше во Србија под лажен идентитет Драган Дабиќ, доктор по алтернативна медицина.
Неговото судење започна во октомври 2009 година и заврши со првостепена пресуда во март 2016 година.
Три сценарија
Некогашниот хашки истражен судија Невенка Тромп за весникот „Аваз“ се осврна на три можни сценарија за пресудата на Караџиќ.
За неа најпосакувана опција , но и најлогична, е тој да биде прогласен за виновен за учество во здружено злосторничко дело заедно со тогашните структури на Србија.
Не ја исклучува, меѓутоа, ниту можноста Караџиќ да биде ослободен.
– Првото сценарио е во голем дел да биде потврдена првостепената пресуда по која добил 40 години затворска казна, бидејќи е виновен за воени злосторства и злосторства против човештвото, вклучувајќи и геноцид, истакна Тромп.
Како второ сценарио се наведува можноста првостепената пресуда да биде сменета и значително да се намали затворската казна, па дури и Караџиќ да биде ослободен.
А како трета можност, таа смета дека би можел да биде осуден на доживотна робија.
– Сметам дека судиите ќе играат на сигурно, па нема да се изненадам доколку на крајот биде осуден доживотно да остане в затвор. Со тоа ќе се смири јавноста во БиХ, односно жртвите на злосторствата за кои е одговорен Караџиќ, нагласи Тромп, која работела како истражен судија на Трибуналот во постапката против поранешниот српски претседател Слободан Милошевиќ.
Тромп, која е автор на книгата „Смрт во Хаг“ каде детално зборува за судењето на Милошевиќ, верува дека поранешниот лидер на босанските Срби ќе биде осуден на доживотна робија со „мали корекции на првостепената пресуда“.
– Тоа би бил некаков статус кво. Првичната пресуда е веќе позната. Ако не се допира улогата на Србија во војната во БиХ, тогаш тоа е некоја сигурна опција за Трибуналот, изјави Тромп.
Караџиќ е обвинет по две точки за геноцид, по пет точки за злосторства против човештвото и по четири точки за кршење на законите и обичаите за војување, кои ги извршиле српските сили во текот на оружениот судир во БиХ од 1992 до 1995 година.




