„Разочарани сме и го разбираме гневот на граѓаните по одлуката на Уставниот суд времено да го укине мораториумот за ДУП-овите за општина Центар„ изјави на прес конференција градоначалникот на општина Центар Саша Богдановиќ.
Уставниот суд вчера времено го укина мораториумот што општина Центар го изгласа за вкупно 31 детален урбанистички план, се додека не ја донесе одлуката дали Општината имала уставна надлежност да воведе забрана за спроведување на ДУП-овите.
Богдановиќ денеска кажа дека „мораториумот е на сила, се додека не ја добијат одлуката од Уставниот суд“. За одлуката треба да расправа и Советот на општината и најави дека тие ќе ги преземат сите правни можности мораториумот да остане на сила додека плановите не се ревидирааат.
Мораториумот беше воведен на седница на Советот на крајот на декември 2017 година кога почна да се преиспитуваат и изменуваат постојните планови.
Досега усвоени се два нови планови за Ново Маало и за Мирче Мацан во кои од постојните планови се избришаа хотели и згради со голем габарит, а се вцртаа паркови и зеленило.
Но, се уште се работи на плановите за Мал ринг, каде што според постојниот ДУП треба да се градат „Шпанските скали“ и земјиштето спроти Градскиот трговски центар на кое се вцртани три згради од по 60 спрата, и уште толку згради по 40 спрата.
По одлуката на Уставниот суд, Советот на општина Центар мора да го укине мораториумот и да одобри градење по постојните планови за кои експертската анализа покажа дека се незаконски и не овозможуваат хумано живеење за жителите на градот од апсект на доволно зеленило, светлина и густина на згради.
Богдановиќ го повика Уставниот суд да ја преиспита одлуката и ги повика Градежната комора и Комората на Северозападна Македонија да ја повлечат иницијативата што ја имаат пдонесено до Уставниот суд за укинување на мораториумот.
Сепак правниот вакуум што се создава од 30 дена, е доволно време за инвеститорите да поднесат барања за градење на веќе утврдените маркички за градби.
„Уставниот суд се согласува дека еден ДУП може да се смени со друг, но додека се подготи новиот план, ако во меѓувреме немате мораториум и почне да се гради по постојниот план, залудно вие ќе носите нов план. Сега со одлуката на Уставниот суд ни се ускратува можноста за мораториум“, рече Богдановиќ.
За него е исто така чудно што Уставниот суд повеќе од една година не одлучувал по иницијативата што ја поднела општина Центар, а за две месеци одговорил на барањето на Коморите за укинување на мораториумот.