Британската полиција денеска распореди свои вооружени припадници пред еквадорската Амбасада во Лондон откако на профилот на Викиликс на Твитер беше објавено сознание од високи извори дека основачот на организацијата Џулијан Асанж би можел да биде исфрлен од објектот „во наредните часови или денови“.
Локалните медиуми јавуваат дека ситуацијата во Амбасадата е мирна и оти ниту еден нејзин вработен, ниту британските власти не го коментираа статусот на Твитер.
Лондонската полиција соопшти дека нема промени во полициската процедура. Во соопштението се додава дека има активен налог за апсење на Асанж и оти полицијата „има обврска да постапи по тој налог доколку тој ја напушти Амбасадата“.
Секојдневната полициска стража пред Амбасадата беше укината во октомври 2015 година повеќе од три години откако беше воспоставена и се премина на она што полицијата го нарече „прикриено“ дејствување.
Асанж е во еквадорската Амбасада од август 2012, откако се засолни поради страв дека британските власти ќе го уапсат и екстрадираат во САД кои го бараат поради објавување илјадници тајни воени и дипломатски документи.
Пред два дена, претседателот на Еквадор Ленин Морено го обвини Асанж, дека постојано ги прекршува условите од неговиот азил во амбасадата во Лондон.
Во говорот пред Еквадорското здружение за радиодифузија во вторникот, Морено го обвини Викиликс за откривање на телефонски разговори и приватни разговори, а исто така се пожали на „фотографии од неговата спална соба“, за тоа што јаде и како танцува неговата сопруга и ќерка и пријателите.
-Асанж го прекрши договорот што го постигнавме со него и неговиот правен советник премногу пати , рече Морено.
-Тоа не значи дека тој не може да зборува и да се изразува слободно, но не може да лаже, ниту да ги пробива приватните сметки или телефони, рече Морено.




