Во пресрет на дваесетгодишнината од формирањето на Независните писатели на Македонија ќе се одржи првата регионална книжевна манифестација „Писателот е присутен“ на која ќе учествуваат еминентни писатели од регионот и членови на НПМ, а ќе се одржи во Скопје (31 октомври во кафе-бар „Менада“ од 20 часот) и во Гевгелија (1 ноември, сала „Милениум“, хотел „Аполонија“ од 20 часот).
Настанот во кафе-бар „Менада“ ќе започне со промоција на новиот број на списанието „Наше писмо“, по што ќе следува книжевен перформанс на тема „Писателот и стравот“.
На оваа тема од што се плаши писателот во самиот процес на пишување и потоа, како и стравот од совремието и неговите општествено наметнати сатрапи, моќниците на политичката сцена, медиумите, кои пекаат по нови жртви и ексклузивно произведени „случаи“, околината-секогаш гладна за својот малограѓански сеир, ќе зборуваат гостите: Предраг Луциќ и Еди Матиќ од Сплит, Синан Гуџевиќ и Дарија Жилиќ од Загреб, Милорад Поповиќ од Подгорица, како и македонските писатели Ферид Мухиќ, Богомил Ѓузел, Јасна Котеска, Ермис Лафазановски, Јовица Ивановски, Елизабета Шелева, Лилјана Дирјан и Роберт Алаѓозовски. Во вториот дел од вечерта авторите ќе читаат „без страв“ фрагменти од своите книжевни дела.
И во Гевгелија, на 1 ноември (петок) во салата „Милениум“ на хотелот „Аполонија“ (20 часот) ќе се одржи промоција и книжевна вечер на која исто така ќе настапат гостите од регионот и македонските автори.