Реис ул улема хаџи Сулејман ефенди Реџепи останува поглавар на Исламската верска заедници. Ријасетот синоќа порача дека е единствено тело кое го назначува поглаварот на ИВЗ и дека судската одлука за негова смена и целиот случај се скандалозни, зад кои стои политиката.
-Исламската заедница е самостојна и автономна институција гарантирана со Уставот на РСМ. Го има својот Устав, ги има своите правилници и согласно Статутот ниту еден орган, ниту една институција во државата не може да одлучува кој ќе биде Реиз ул-Улема. Може ли судот да одлучува кој ќе биде поглавар на МПЦ? Таа одлука е на Синодот на МПЦ, а не е на некој друг орган. Никој не може да одлучува кој ќе биде носител на верската јурисдукција на Реиз ул-Улема. Тоа е одлука на Ријасетот, изјави Муамер Вејсели од ИВЗ.
Тој оцени дека „вакви скандалозни одлуки се случуваат само во дивиот запад, само во една држава во која не функционира правниот систем“.
– Ние сме секуларна држава согласно Уставот и во оваа секуларност согласно Законот за положба на верските заедници секоја верска заедница е уставна категорија, секоја религиозна група регистрирана во дражвата го има внатрешното нејзино уредување и внатрешната хиреархија. Согласно тоа внатрешно уредување, согласно внатрешните акти, согласно внатрешната хиреархија на поставување на органите на институциите на ИВЗ, Ријасетот е единственото тело што одлучува кој ќе биде носител на јурисдикцијата на Реиз ул-Улема, потенцира Вејсели и порача носителите на јавни политички функции да се држат подалеку од Исламската верска заедница.
Ријасетот на Исламската верска заедница синоќа оддржа седница во Кондово, по чие завршување актуелниот поглавар на ИВЗ реис ул улема хаџи Сулејман ефенди Реџепи изјави дека Исламската заедница е силно огорчена од овој скандал.
Ваков скандал не паметам во исламската заедница. Ова е незапамтено и нема да се заборави, изјави реисот Реџепи по завршување на седницата на Ријасетот во Кондово.
– За цел свет сум носител на мир и спокојство, на соживот и толеранција, само овде демонстрирам сила, посочи поглаварот на ИВЗ, додавајќи дека не сакаат власт и политика која, како што рече, прави зулум во народот.
Порача дека нема да дозволи да ги злоупотребат и дека тој лично не може да се злоупотребува.
-Зборувам во име на 13 муфтивства во земјава, ние сме присутни во секоја педа од земјата и во име на сите, едногласно, беа усвоени заклучоци дека ваква власт, која се занимава со ујдурми, која шири анархија, не ни треба и заради тоа пренесувам и изјавувам дека ние ова не го сакаме, ниту го заслуживме, оти сме биле и остануваме како примерна зедница, изјави по завршување на вонредната седница на Ријасетот на Исламската верска заедница.
За него Скендер Бузаку, кој според судското решение, треба да биде новиот поглавар на ИВЗ, е отпадник од Исламската верска заедница, дури и од исламската заедница.
Седницата следуваше откако Бузаку повикувајќи се на судското решение најави дека од денеска тој е новиот поглавар на Исламската верска заедница.
-Ќе раководам со ИВЗ согласно судско решение, рече Бузаку, дополнувајќи дека побарал финансиската полиција да направи увид во досегашното работење на поглавараот Сулејман Реџепи.
Бузаку вчера рече дека Основниот Суд Скопје 2 донел решение за разрешување на поглаварот на Сулејман Реџепи и го прифатил барањето нов поглавар на ИВЗ да биде тој, а одлуката, според него, денеска ќе биде објавена во Службен Весник.
Во одлуката на која се повикува се вели дека е донесена врз основа на записник од вонредна седница на Ријасетот на ИВЗ одржана на 30.03.2019, на која била констатирана неотповиклива оставка на поглаварот на ИВЗ, Сулејман Реџепи, која тој, според документот, ја поднесол на 25 март оваа година. Според записникот, на истата седница на Ријасетот одржана на 30 март, била донесена одлука за избор на Бузаку за нов реис ул улема на ИВЗ“.