Во камерна атмосфера, во кафето Ли, промовирана беше „Димензии на бајките – мрак и светлина” од Лени Фрчкоска.
Теориската студија прави пресек на теориите за потеклото, структурата и проникнувањето на бајките во фолклорното творештво преку современието, главно низ психоаналитиките толкувања и родовите перспективи на авторите како Владимир Проп, Жак Лакан, Јулија Кристева, Сандра Ли Бартки, Славој Жижек до современата инструментализацијата на фантазмот на бајката како средство за идеолошко спознавање.
За книгата зборуваше професорката Славица Србиновска која истакна дека станува збор за теориска студија која се појавува во период на релативно кризна стварност на игонирирање на хуманистичките науки, но преку темата отвора прашања за димензии на хуманоста кои „денес се потиснати или се бришат за сметка на интересот на капиталот како доминанта на ова време“.
– Станува збор за теоретска книга која во буквална смисла го исполнува значењето на поимот теорија, (на старогрчкиот знаци “гледање”, “медитирање за” и „спектакл”) така и книгата како теорија и како толкување има сопствен аналитички пристап кон различни жанри на уметничка креација или културна продукција во текст од зборови и слики и показува како индивидуата може да стане субјект, како успева да се справи со нормите и системите на уредување и како во сопствените напрегања за досегнување на поредок на добро, убаво и вистинито незапирливо се напрега и копнее тоа да го реализира. Книгата говори за бајките како засолниште на субјектот кој се самоспознава и созрева, свесно упатувајќи се кон светот кој посакува да го изгради како различен од оној во кој минувал низ препреки, несреќи или трауматични епизоди, но сепак успешно завршува од другата страна, во посакуваната егзистенција на благосостојба – вели Србиновска.
Србиновска зборуваше и за жанрот бајка кој покрај целата еднодимензионалност, пропоционалност и хармоничност на структурата во својата суштина е поврзан со осцијални, атрополошки и политички концепции кои трансцедентираат низ епохите.
-Во бајките се крие темата на маргинализирани, понижените, но и можноста да го променат својот статус. Оваа студија во тој контекст се повикува на теоријата на Енст Блох за надежта и копнежот по еден свет, не таков каков што е, туку утописки, онаков каков што би требало да стане за да биде хуман – кажа Србиновска.
Фрчкоска во своето кратко излагање кажа дека бајките во својата суштина се литераризирани идеолошки приказни. Како такви ја задржуваат тензијата на емнаципација паралелно со таа на пренесување конзервирани пораки. Како такви „нивната употрева во образовниот и медиумскот сектор е политичка одлука“.
-Низ теми за субјектот и неговото место во социјалните релации бајките едуцираат за општествените улоги. Со тоа се потврдува и нагласува важноста на улога на бајката во образовниот процес на децата, интегритетот на нивната личност и вредностите кои ги восприемаат – кажа таа.
Книгата во може да се набави на Саемот на книга и во книжарниците на Или-или, Литература, Антолог.