„Министерството за внатрешни работи ќе го третира случајот со пратеникот Павле Богоевски како и секој друг случај за кој е покрената истрага“ кажа денеска министерот за внатрешни работи Оливер Спасовски.
„ Без разлика дали некој носи некаква функција или не, тоа не е никаква предност за него, туку напротив, тој само има поголема одговорност.
Затоа ниту јас, ниту колегите од МВР немаме никаква причина да не постапуваме за овој случај на начин како и за сите други случаи. Се работи за настан кој е во истрага, но и јавноста знае дека не станува збор за разговор што бил прислушуван од страна на институциите, туку бил сниман со мобилен телефон или друг уред.
Добро е сето тоа да се расчисти затоа што сакаме да застанеме на патот на злоупотребата на снимањето и нарушувањето на приватноста на кој било човек“ кажа Спасовски.
Снимката на која се слуша гласот на пратеникот Богоевски беше објавена на профил со пседвоним Илија Громовник. По ова пратеникот Богоевски во полициската станица Центар, се пријави самиот себеси, но и непознат сторител. Во одделот за борба со недозволена трговија и шверц се пријави сам себе, бидејќи авторот на постот на руската социјална мрежа ВК тврди дека пратеникот по телефон нарачувал да купи кокаин. Богоевски тврди дека не купувал кокаин туку канабис масло за близок човек, а во полиција пријави и дека бил нелегално снимен од таксист кого не го памти.
Богоевски вели дека се што ќе побара полицијата во истрагата тој ќе направи, ако треба и тестирање.
Во однос на случајот во Прилеп каде во април годинава, на разглас биле пуштани прислушувани телефонски разговори од 2012 гдоина, Спасовски кажа дека истрагата е при крај и деновиве очекува да биде поднесена кривична пријава.