Новинарите не се добро запознаени со Законот за слободен пристап до информации и многу малку го користат како алатка за да дојдат до сознанија и документи за истражувања. Ова е генералниот заклучок од истражувањето кое го спроведе невладината организација Пролиберти фокусирано на тоа колку новинарите го користат законското право за слободен пристап до информации од јавен карактер.
Поголемиот дел од новинарите или 77 проценти сметаат дека законот е корисна алатка, 100 проценти рекле дека имале потреба од информација од јавен карактер, но само 42 проценти рекле дека некогаш го употребиле ова право. Од организацијата Центар за граѓански комуникации сметаат дека бројката на новинари кои го употребиле ова право е многу помала од 42 проценти бидејќи новинарите често ги мешаат поимите барање информација од јавен карактер согласно Законот за слободен пристап и пишување обичен маил со прашање до портпарол или институција.
Од друга страна, 73 проценти од новинарите сметаат дека достапноста до информациите од јавен карактер е тешка, 23 проценти дека е многу тешка, а само 4 проценти ја оцениле како делумно лесна и ниту еден како лесна.
Додека го спроведувале истражувањето, претставниците на НВО Пролиберти дошле до сознанија дека дел од институциите немаат наведено службено лице за контакт за слободен пристап до информации на нивните веб страници согласно законот, а кај дел од оние кои имале наведено таков контакт се покажало дека телефоните воопшто не функционираат.