Парадата на гордоста доби контра настан. Паралелно со првиот Скопски Прајд во главниот град се одржа и парада насловена како „Сведоштво за семејството“. Како организарот се јави „Сојузот за живот“ што го сочинуваат невладини организации, движења и неформални групи кои се залагаат за заштита на вредностите на традиоционалното семејство и брак.
„Во духот на заштита на вредностите на бракот и семејството како граѓани и верници сме тука да сведочиме за највредното за нас. Нашата порака пред се е до луѓето кои ги носат одлуките во државата, сегашната, но и идните власти, како и до целата македонска јавност дека најголем процент од верниците не го прифаќаат процесот што треба да доведе до редефинирање на тоа што е брак, семејство, пол и род. Се спротиставуваме на таа идеологија и поучени од случувањата на запад и страшните последици кои ги гледаме таму, се залагаме тоа да не пушти корени во нашата држава и општество“, изјави отец Ивица Тодоров.
Според него, граѓанско-верскиот собир не е противтежа на Парада на гордоста што, исто така, денеска се одржува во Скопје.
„Ние не сме против никого, но не ја прифаќаме пораката на процесот што некои структури сакаат да го започнат конкретно со Парадата на гордоста“, додаде отец Тодоров.
Граѓанско-верскиот собир започна со литургија во црквата „Света Богородица“. По нејзиното завршување, според најавите, поворката со поддржувачите на „Сојузот за живот“, се упати на марш низ центарот на Скопје каде меѓу останатото мина крај Собранието и Владата. Крајна точка на маршот е соборниот храм „Свети Климент Охридски“ со читање на заедничка декларација за живот.