За една година до Советот на јавни обвинители стигнале повеќе од 200 претставки од граѓани кои биле незадоволни од работата на обвинителите.
Оштетените граѓани или правни лица барале од Советот да реагира и да преземе конкретни дејства против обвинители кои воопшто не постапувале по пријавите кои ги поднесувале, а дел од предметите и застареле. Но и покрај зголемениот број на претставки (во 2017 биле поднесени 166 претставки, а во 2018 -201) Советот соопшти дека „биле разгледани сите преставки, но не било утврдено прекршување на законите“.
„Во текот на проверките на наводите во претставките, воочени се пропуштања во постапувањата на јавните обвинители, од формална природа, во мал дел и пропуштања од суштинска природа. Заради тоа од повисоките јавни обвинителства им е укажувано во иднина не се повторуваат вакви повреди, меѓутоа констатирано е дека истите не биле од влијание на законитоста на донесени одлуки“, пишува во Извештајот кој Советот на јавни обвинители го достави до Собранието.
Претседателот на Судскиот совет Коле Штерјев потврди дека не е поднесена ниту една иницијатива за да се утврди одговорност кај некој обвинител.
„Вие се претворивте во биро за вработување. Сте добиле преставки од граѓани за непостапување или неажурно постапување и за застарување на кривичните дела, а не сте поднеле ниту една пријава за да се провери дали совесно си ја извршувал работата.
Или очекувањата на јавноста беа преголеми или вие не сте загризале повеќе, но очекувањата не се исполнети. Треба да бидете многу поактивни во делот на разрешување на обвинители, затоа што ако тие знаат дека се под ваша лупа, многу поодговорно ќе си ја вршат работата“, рече пратеникот од ВМРО ДПМНЕ Зоран Илиоски.
„Немаме постапка за разрешување. Тоа е работа на Вишите обвинителства, ние можеме да иницираме постапка до Јавното обвинителство, но не сме покренале. Советот кога ги разгледувал претставките, не утврдил дека има основа да препорача разрешување“, одговори Штерјев на дебатата во Комисијата за политички систем каде се разгледуваше Извештајот на Советот на јавни обвинители.
Во 62 предмети, претставките се однесувале за работата на конкретни јавни обвинители, но Советот не кажува за какви предмети се работи, ниту за кои обвинители.
„Извештајот за минатата година е пуст како тој од претходната и може да се заклучи дека не се мрднало ништо во решавање на проблемите.
Штерјев потврди дека биле разгледани и жалбите на обвинителите Гордана Гешковска, Јован Цветановски и Златко Биковски кои поради непостапување по настаните од 27 април беа дисциплински казнети со 30 проценти пониска плата во период од половина година. Советот на обвинители донел одлука по нивните жалби и ја доставил до Обвинителството, но Штерјев не кажа каков бил ставот на Советот на обвинители.
Овие тројца обвинители извршија увид во Собранието дури откако биле изнесени хард дисковите со снимки во настаните во Собранието. Петчлена комисија во ЈО одлучи дека тие не го презеле потребните истражни дејствија нав реме, но наместо разрешување, изречена им беше само дисциплинска мерка.