Борис Џонсон е избран за лидер на британската владејачка Конзервативна партија и воедно ќе ја наследи Тереза Меј на премиерската функција.
Џонсон утре би требало и службено да стане премиер, и тоа откако кралицата ќе го прифати неговиот мандат
Околу 160.000 членови на Конзервативната партија вчера попладне го завршија гласањето за нов лидер на партијата, а се изјаснуваа меѓу поранешниот градоначалник на Лондон и актуелниот шеф на дипломатијата, Борис Џонсон и Џереми Хант. За Џонсон гласале речиси 100 илјади од членовите на партијата.
Џонсон, кој вети дека Велика Британија ќе ја изнесе од ЕУ со или без договор, беше фаворит и во анкетите спроведени пред изборната трка.
Неколкумина членови на Владата на Меј веќе најавија дека ќе поднесат оставки пред Џонсон да стапи на новата функција и самиот да ги отпушти поради противењето на неговата намера Велика Британија да ја изведе од Европската унија без договор.
Британската министерка за образование Ен Милтон денеска поднесе оставка поради „сериозна загриженост“ во врска со Брегзит без договор со ЕУ. Таа во оставката истакнува дека „искрено се надевала“ оти Велика Британија ќе може да ја напушти ЕУ во март со договор.
Министерот за Европа и Америка, Алан Данкан вчера поднесе оставка, а оставки пред три дена најавија и министерот за финансии Филип Хамонд и министерот за правосудство Дејвид Гок.
ЕУ очекува конструктивна соработка со Џонсон
Шефот на европскиот преговарачки тим за Брегзит, Мишел Барние, изрази надеж за конструктивна соработка со новоименуваниот премиер на Обединетото Кралство, Борис Џонсон.
-Очекуваме да соработуваме конструктивно со премиерот Борис Џонсон кога ќе стапи на функција, за олеснување на ратификацијата на Спогодбата за повлекување и постигнување уреден Брегзит, напиша Барние на Твитер.
Тој потсети дека, како што се договорија лидерите на 27-те земји членки, ЕУ е подготвена за одредени промени во политичката декларација за идното партнерство меѓу ЕУ и Лондон.
Повеќето политички партии во ЕУ се против ова сценарио и предупредуваат дека тоа „не смее да се дозволи“, како што истакнаа попладнево европските Зелени преку соопштение до медиумите.
Преговорите за Брегзит се во ќор-сокак откако Меј не успеа да добие мнозинство во британскиот парламент за постигнатиот договор со ЕУ. Рокот за Брегзит е 31 октомври, но новоизбраната претседателка на Европската Комисија, Урсула Фон дер Лајен, веќе стави на знаење дека не би била против дополнителен рок доколку е оправдано




