Пред денешната нова средба меѓу власта и опозицијата за предлог – законот за попис на населението, преговарачот од ВМРО ДПМНЕ Илија Димовски најави дека опозицијата ќе бара пописот да се спроведе во 2021 година, а не наредната година како што предлага власта.
„Пописот не треба да користи за политички цели и да биде предмет на калкулации меѓу партиите. Тоа видовме дека не е добро – рече Илија Димовски од ВМРО ДПМНЕ на прес конференција во Собранието.
Димовски исто така напомена дека ,,пописот не треба никој да го сфати како страв или радост за добивање или губење на граѓански права“.
ВМРО ДПМНЕ ќе бара пописот да се одржи во 2021 година за да има доволно време за подготовки.
Во однос на законот рече дека во него треба прецизно да се дефинира што е резидентно население, да се наведат документите потребни за идентификација ( лична карта, пасош), оние кои ќе се пријават преку електронската евиденција да не се запишуваат како резидентно население и да се спречи можноста секој да може да дава податоци за друго лице.
– Сега како што е предложено – едно лице може да дава податоци и за луѓето кои живеат во 10 други куќи – рече Димовски.
ВМРО ДПМНЕ нема доверба во директорот на Државниот завод за статистика и затоа предлага Собранието да изгласа колективно тело кое ќе биде составено од академици и професори и кое ќе биде организатор на целиот процес.
Според Димовски причина за пропаднатиот попис во 2012 година бил ,,сомнежот дека се собираат податоци кои не се реални“.
– За тоа се понесе политичка одговорност. Кога би биле попаметни, искуството треба да го искористиме – рече Димовски.