Вечерва во продолжение на фестивалот „Синедејс 2013“, еден ден пред официјалното затворање, во киното Милениум во 20:00 часот ќе се прикажува филмот „Валенса – надежен човек“.
Малкумина можат да кажат дека го смениле светот во којшто живеат. Еден од нив е Лех Валенса. Овој филм ја следи приказната за добитникот на Нобелова награда за мир и основач на независниот синдикат „Солидарност“ во периодот кога настаните во 70-тите години во Полска водат кон мирна револуција.
Филмот „Валенса – надежен човек“ го режира Анджеј Вајда, а забележлива е и првокласната изведба на Роберт Виецкевич.
Култниот режисер Брајан Де Палма се враќа на заводливите и подмолни приказни со трилерот „Страст“ кој е исполнет со секс, амбиција, завист и темна страна. Филмот е на програмата е во 22.30 во кино Милениум. Главните улоги ги толкуваат Рејчел Мекадамс („Полноќ во Париз“, „Шерлок Холмс“) и Номи Рапас („Прометеј“).
Од другите филмови селектирани за денеска, се и „Јужњаци марш!“ на режисерот и автор Горан Војновиќ, во 19:00 часот во Фросина. Во овој филм, своја улога има и Мето Јовановски.
Во кино Фросина во 21:00 часот ќе се прикажува и филмот „Барајќи си ја среќата“ на македонската режисерка Марија Џиџева.
Приказна за осуммина неженети мажи полни со надеж кои започнуваат долго патување до Москва во потрага по среќа. „Барајќи ја среќата“е документарен филм составен од 3 приказни (Вера, Надеж и Љубов) каде што судбините на главните карактери се преплетуваат со нивната потрага по среќа.
Во 22:30 на програмата во МКЦ е концертот на Чалгија саунд систем.