На веб страницата на миланскиот дневен весник Ла Верита утрово е објавен видео прилог со аудио снимки од како што се најавува договарањето меѓу Бојан Јовановски и Орце Камчев. Во една од снимките, весникот тврди дека е гласот на специјалната јавна обвинителка Катица Јанева, која преку телефон, како што вели новинарот, му потврдува на Камчев да не се секира дека се ќе биде во ред.
-Не се секирај за ништо се ќе биде ОК, вели женскиот глас за кој весникот тврди дека е на Јанева.
На објавените снимки се слуша како соговорниците се договараат, при што во еден разговор Камчев како што тврди весникот, го прашува Бојан Јовановски:
„Втора работа, не знам дали жената е со нас во играва, таа Лиле“, при што весникот тврди дека се работи за обвинителката Лиле Стефанова, која во тоа време го води предметот Империја.
Понатаму Камчев објаснува: „Еднаш, Чифлиганец кога ми се јави, ми бараше дуќан за нејзе за стоматолошки ординации, за глупости и тие работи… Јас од….в сите тие работи, зашто не ме интересираше…“
ЛаВерита вчера првпат објави материјали за „Рекет“ меѓу кои и видео снимка, на која се Бојан Јовановски и Зоран Милески Кичеец кои се осомничени во случајот за тргување со влијание и за перење пари, и Орце Камчев кој е сведокот во случајот. Аудио разговорот е меѓу Јовановски и Камчев, кој се однесува на случајот Империја, во кој меѓу осомничените е и Камчев, и во кој се споменува и името на специјалната јавна обвинителка Катица Јанева.
Адвокатот Звонко Давидовиќ за НОВА вели дека објавената снимка не може да ја попречи истрагата, но испраќа сигнал до Обвинителството дека случајот што побрзо треба да биде расчистен.
За Давидовиќ многу пострашно е што излегуваат во јавноста вакви материјали.
Снимката за „Рекет“ останува доказ: Што открива нејзиното објавување
Вчерашната снимката е објавена во јавноста е со датум од 20 февруари (среда), на која Боки 13 му ветува на Камчев дека тој ќе излезе од притвор во понеделник, односно на 25 феруари. Осомничениот бизнисмен нема да биде пуштен од куќен притвор ниту во понеделник, ниту во вторник како што ветува Боки 13, но ослободувањето ќе стигне една недела подоцна, односно на 4 март кога Врховниот суд ќе донесе одлука да му го укине и куќниот притвор на Камчев.
Снимката е направена кога Орце Камчев е веќе два месеци во куќен притвор, откако на предлог на СЈО кои бараат поблаги мерки, на Камчев и Мијалков за случајот „Империја“, затворскиот притвор на 27 декември им се заменува со куќен.
За адвокатот Давидовиќ, во оваа снимка е проблематична и улогата на бизнсименот кој е сведок во Обвинителството за „Рекет“.
„Ако некој доброволно, за добивање одредени привилегии даде пари, тоа е поткуп. Исто така, се поставува прашањето и кој држи толкава сума на пари дома и од каде се тие пари. Сето тоа треба да се истражи“, рече Давидовиќ за НОВА.