Врховниот суд го потврди решението на Кривичниот совет на Одделението за организиран криминал и корупција дека не се исполнети законските претпоставки за екстрадиција на Томор Mорина во Србија.
Министерството за правда на Србија бараше тој да биде екстардиран врз основа на распишана потерница од Интерпол поради основано сомневање дека сторил кривично дело „Воени злосторства против цивилно население“.
Во образложението на решението е наведено дека лицето Морина чија што екстрадиција се бара, е државјанин на Косово и на Велика Британија, а не државјанин на Србија која бара екстрадиција додека пак, кривичното дело за кое се бара екстрадиција на лицето е сторено на територија на Косово ставено под власт на Обединетите нации со резолуција на Советот за безбедност на Обединетите нации од 10.06.1999 година, независно од 2008 година, која независност е признаена и од страна на Република Северна Македонија. Поради овие причини Судот утврдил дека не се исполнети законските услови за Морина да биде екстрадиран, а Врховниот суд го потврди решението.