Советничка група на СДСМ ја напушти седницата на Град Скопје на чиј дневен ред беше ставена точката за одлуката за концесионер на депонијата „Дрисла“.
Советниците на СДСМ побараа да се тргне оваа точка од дневниот ред, бидејќи според нив, претставува кривично дело, односно неспроведување на судска одлука.
Советничката група на ВМРО – ДПМНЕ гласаше против предлогот на СДСМ. Во монетов тече расправата во советот на Град Склопје за избор на нов концесионер на „Дрисла“.
Како што НОВА веќе објави Германската амбасада остро реагираше на одлуката на комисијата составена од градот Скопје со која тие повторно го избраа италијанскиот конзорциум за концесионер на депонијата „Дрисла“.
На прашање на НОВА како ќе ја коментираат одлуката со оглед на фактот дека Управниот суд веќе донесе одлука во корист на германската фирма која беше второрангирана на тендерот и која се жалеше на нерегуларности, од Амбасадата велат дека ваквото однесување на градските власти ќе ја загрози правната сигурност за потенцијалните германски инвестиции.
„Шолц“ беше второрангирана на тендерот на Градот Скопје за концесионер на депонијата „Дрисла“. Тие се жалеа пред Вишиот Управен суд на низа пропусти во постапката за избор на концесионер. Судот со својата одлука од Јули годинава ги потврди сомнежите околу изборот на победникот за кои пишуваа и медиумите. Документите докажуваа дека победничката фирма од Италија „ФЦЛ Амбиенте“ е регистрирана два дена пред отворањето на понудите, а во регистарот на компании во Италија се водела како неактивна фирма. „Шолц“ приложи и документи од италијанските судови кои потврдуваа дека партнерот „Униеко“ во март годинава влегол во претстечајна постапка. Се појавија низа пропусти за кои НОВА пишуваше.