По вчерашното приведување и одредување на мерка притвор на Катица Јанева, останува отворено прашањето кој ќе ја наследи на функцијата шеф на Специјалното јавно обвинителство.
Според републичкиот јавен обвинител Љибомир Јовески, СЈО согласно законот со кое е основано се уште има мандат и доколку ЈО кој раководи со ова Обвинителство е спречен да ја извршува оваа функција, тогаш Советот на јавни обвинители ќе треба да го констатира тоа и веднаш од редот на јавните обвинители на ова Обвинителство да определи в.д обвинител кој ќе раководи со ова обвинителство.
-За тоа има законски основи, бидејќи во Законот за СЈО во завршните одредби има одредба која пропишува дека доколку во одредени случаи не се поинаку регулирани, се однесува Законот за ЈО. Во Законот за ЈО постои одредба според која Советот е надлежен да определува вршител на должноста. Според тоа мене ми се чини дека доколку специјалниот јавен обвинител не може да ја извршува оваа функција, Советот веднаш треба да постави јавен обвинител од редот на јавните обвинители во тоа Обвинителство, рече Јовески на вчерашната прес конференција.
Јовески и обвинителката Вилма Русковска вчера најавија дека до Советот на јавни обвинители ќе испратат известување за мерката што е одредена на Јанева и ќе побараат да донесат одлука по тоа.
Претседателот на Советот на јавни обвинители Коле Штерјев смета дека не може да се назначи в.д специјален обвинител без да и истече мандатот на Јанева.
– Само во еден случај, Советот назначува вршител на должност. Тоа е тогаш кога на еден јавен обвинител му се прекинува мандатот или е разрешен и Советот назначува вршител на должност од редовите на тоа обвинителство. Доколку Јанева не е разрешена и додека не и се прекине мандатот, не можеме да назначиме вршител на должност. Постапката за разрешување е предвидена со законот за СЈО, каде се вели дека доколку предлагаме ние, треба да подготвиме извештај и да го доставиме до Собранието, комисиите да го разгледаат и потоа Собранието да ни предложи ние да разрешиме, појаснува Штерјев во изјава за медиумите.
Советот на јавни обвинители во постапката за избор и назначување на Специјалното јавно обвинителство може да постапува само по предлог на Собранието, претходно утврден од Комисијата за избори и именувања, а изгласан со двотретинско и Бадинтерово мнозинство, вели претседателот на собраниската Комисија за избори и именувања Илија Димовски.
– И изборот (член 3) и разрешувањето (член 18) на Специјалното јавно обвинителство е регулирано со специјалниот закон и не може и не смее да се применува друг закон. Постапката е строга, зошто и институцијата е значајна. Во двете постапки (и избор и назначување) Собрание на Република Македонија и Комисија за избори и именувањата не може, ниту смее да се прескокнат, односно ниту да се разреши СЈО, ниту да се назначи вршител на функцијата СЈО без овие две инстанци во постапката, вели Димовски во изјава за МКД.мк.