На првото рочиште за предметите што ги застапува СЈО по притворот на специјалната обвинителка Катица Јанева, адвокатите на обвинетите во предметот „Титаник“ побараа судењето да биде прекинато поради притворот на Јанева, со што според нив нема веќе овластен застапник на обвинението.
Адвокатот Димитар Дангов рече дека иако сите во судницата ја почитуваат, како што рече уважената обвинителка Лиле Стефанова, сепак таа не може повеќе да го застапува обвинието за „Титаник“.
-Јанева е единствено надлежна да го застапува секој кривичен предмет на СЈО, па поради тоа, со респект кон уважената обвинителка Лиле Стефанова, кон која сите во салата имаат голема почит, сепак морам да кажам дека истата нема право да го застапува предметот, поради притворот на Јанева. Нејзиното доаѓање го сметам како можност да види што ќе се случи. Уважената Стефанова не може да има повеќе права од Јанева и да го застапува обвинението, рече Дангов, кој побара од судот да ја прекине постапката.
Пратеникот Илија Димовски, кој е обвинет во случајот „Титаник“, на денешното рочиште побара судењето да запре се додека Советот на јавните обвинители не се произнесе за Катица Јанева.
-Предлагам судот да донесе решение до завршување на постапката на Советот на јавни обвинители и Собранието, и доколку одлуките бидат негативни по Катица Јанева, судот да ја прекине расправата, изјави Димовски.
Тој истакна дека постои опасност и други случаи на СЈО да биле зафатени со „Рекет“’
-Постои сомнеж дека и други предмети биле инфицирани со „Рекет“, како и дека и други политичари и бизнисмени биле користени за рекет, па затоа би требало постапките да запрат, рече Димовски.
Судијата даде пауза до 11 часот кога ќе биде познато дали судењето за „Титаник“.
Предметот, кој го води судијата Осман Шабани, а застапник на обвинението е Лиле Стефанова, се наоѓа во доказна постапка.
Досега се изведени околу 4.850 од над 5.900 предложени материјални докази од СЈО.
Освен поранешниот премиер Никола Груевски кој е во бегство, во „Титаник“ обвинети се и Кирил Божиновски, Миле Јанакиески, Гордана Јанкулоска, Билјана Бришкоска Бошковски, Илија Димовски, Мунир Пепиќ, Едмонд Темелко, Леко Ристоски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашјаковска.
Тие се осомничени за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.