Бразил ја отфрли помошта што ја понудија земјите од Г7 за борба против пожарите во Амазонија, изјави висок официјален претставник на Бразил, притоа повикувајќи го францускиот претседател Емануел Макрон да се занимава со своите колонии.
– Се заблагодаруваме (на Г7 за понудената помош), но тие средства ќе бидат повеќе потребни за пошумување на Европа, напиша Оникс Лоренцони, шеф на кабинетот на бразилскиот претседател Жаир Болсонаро во блог на информативниот портал Г1.
Францускиот претседател Емануел Макрон вчера рече дека земјите на Г7 ќе издвојат 20 милиони долари за борба против пожарите во Амазонија.
– Макрон дури не успеа да избегне предвидлив пожар во црква која е дел од светско наследство, а сака да дели лекции на нашата земја, рече Лоренцони, алудирајќи на пожарот во Нотр Дам во Париз на 15 април.
Тој додаде дека Макрон има „многу работа дома и во француските колонии“.
– Бразил е демократска земја, слободна и никогаш немала колонијалистичко и империјалистичко однесување како што тоа можеби е и целта на Французинот Макрон, рече Лоренцони.
Претходно, бразилскиот министер за екологија Рикардо Салес оцени дека предложената помош би била добродојдена.
Меѓутоа, бразилскиот претседател Болсонаро подоцна се состана со неколку министри и ја смени реториката.
– Никому не му е потребна нова иницијатива за Амазонија, рече бразилскиот шеф на дипломатијата Ернесто Араухо, притоа укажувајќи дека веќе постојат механизми под покровителство на Конвенцијата на ОН за финансирање на борбата против уништување на шумите и пошумување.
Лидерите на Групата седум најразвиени земји во светот вчера се согласија веднаш да финансираат фонд од 20 милиони американски долари за да им помогнат на земјите од регионот на Амазонија во борбата со шумските пожари и да започнат долгорочна глобална иницијатива за заштита на прашумите.
Сателитите досега забележаа повеќе од 41.000 пожари во регионот на Амазонија оваа година, од кои повеќе од половина избувнаа овој месец. Експертите велат дека најголем дел од пожарите се предизвикани од земјоделците кои го расчистуваат земјоделското земјиште.
-Светската вознемиреност од пожарите во Амазон е непотребна, пожари таму секогаш имало, сечата на шумите е намалена и Амазон не е „бели дробови“ на Земјата, пишува „Форбс“ во извештајот за пожарите базиран на експерти и новинари кои известуваат од теренот.
Форбс пишува дека Амазон при фотосинтеза навистина создава многу кислород, но дека истиот целосно го троши во процес на респирација, при оксидација на органски елементи во самата прашума.
-Главната идеја е дека во моментов нема зголемување на пожарите во Бразил, коментира изданието.
„Форбс“ ги цитира алармирачките наслови на „Си-Ен-Ен“ или „Њујорк тајмс“, дека „Пожарот во Амазон урива рекорди“, додека водечките репортери пишуваат „Пожар без преседан во изминатите 20 илјади години“. Но според магазинот, статистиката укажува сосема друга слика.
-Додека бројот на пожари во Бразил годинава навистина се зголемил за 80 отсто, споредбено со 2018 година, тој е само 7 отсто повисок отколку просечниот број на шумски пожари во изминатите 10 години, изјави Ден Непстед, водечки експерт за прашумата Амазон.
Еден од водечките бразилски новинари во областа на екологијата, Леонардо Кутињо, укажува дека за време на претседателот Лула и министерката за екологија, Марина Силва (2003-2008 година), во Бразил имало најмногу пожари.
-Но никој тогаш не беше обвинет дека тоа е ризично за Амазон, изјави Кутињо.
Според новинарот, зголемените 7 отсто се пожари на ниското и суво грмушесто растение и на запалените стебла сечени за зголемување на земјоделски обработливото земјиште. Сечата на шумата била намалена за 70 отсто од 2004 до 2012 година, иако малку се зголемила во меѓувреме “но дека тоа е само четвртина од максимумот во 2004“ година.
Форбс дознава дека многу познати политичари, актери и спортисти, како францускиот претседател Емануал Макрон, фудбалерот Роналдо, или пејачката Мадона, на социјалните мрежи објавиле фотографии во поддршка на гасењето на пожарите во Амазон, несвесни дека фотографиите се лажни.
Фотографиите не се всушност од пожари, а некои не се и од Амазон. Фотографијата што Роналдо ја сподели е од 2013 година, и е од јужен Бразил, далеку од прашумата, додека фотографиите што ги постирале Макрон и Леонардо Ди Каприо се стари 20 години.
Мадона постирала 30 години стара фотографија од пожари, а некои славни личности постирале фотографии од други места како Монтана, Индија или Шведска, објави Форбс.




