Обвинителот Ацо Колевски кој го потпиша барањето за заштита на законитоста за притворот на Кочан до Врховниот суд, е избран за престедател на Советот на обвинители и за наследник на Коле Штерјев.
Колевски бил единствен пријавен кандидат и е избран едногласно. На седницата на Советот на обвинители присуствувал и Републичкиот јавен обвинител Љубомир Јовески кој го поддржал изборот на Колевски.
Спротивно на барањето на СЈО за притвор на Кочан и одлуките на Кривичниот и на Апелациониот суд кои го одобрија притворот, Колевски потпиша барање до Врховниот суд со кое побара да се оцени законитоста за притворот. За врховните судии кои го уважија ваквото барање на Колевски, меѓу кои е и претседателот на Врховен Јово Вангеловски, се води постапка во Судскиот совет, а Кочан го избегна притворот.
Колевски денеска по изборот за претседател на Советот на обвинители рече дека потегот бил оправдан.
„Сите случувања после тоа го оправдуваат тој потег. Доколку се употребуваше ова вонредно правно средство досега ќе се извршеше некаква контрола во работењето на СЈО, тие ќе немаа таква слобода да постапуваат без контрола и да дојдеме до оваа ситуација јавен обвинител, за жал, да се впушти во недозволени дејствија“, кажа Колевски.
Советот на обвинители вчера ја започна постапката за разрешување на Катица Јанева – шефицата на СЈО.
Коле Штерјев, кој претседаваше со Советот на обвинители вчера кажа дека Советот има право да избере в.д. обвинител, но по разрешувањето на Јанева. Колевски денеска не сакаше да каже одговори дали Советот ќе избере наследник на Јанева.
„Советот одлуките ги носи со мнозинство гласови, така што, доколку ова прашање се постави во работата на Советот јас ќе го изнесам на седница за да го слушнам мислењето на секој од членовите и евентуално заедно да донесеме некоја одлука доколку сметаме дека има потреба. Не би можел да кажам мој став, бидејќи би го прејудицирал мислењето или одлуката која би ја донел Советот во однос на тоа прашање“, рече Колевски.