Историска победа на македонските одбојкари на Европските првенства. По поразите од Финска (1:3), од Турција (0:3) и од Русија (0:3), вечерва во арената „Стожице“ во Љубљана е совладана селекцијата на Белорусија со 3:1 (по сетови: 23:25, 25:19, 29:27, 25:20) за прва победа во групата Ц.
Централна фигура на натпреварот беше Никола Ѓорѓиев. Македонскиот капитен беше нерешлива загатка за белоруските одбојкари и мечот го заврши со преку 30 освоени поени. Подеднакво незгоден на сервис и убиствен во напад, за 31 годишниот струмичанец немаше загубена ситуација, а честопати и навидум загубените ги претвораше во добитнички.
Никаква противигра немаше Белорусија за Ѓорѓиев кој без проблеми минуваше низ двојните блокови, а без проблеми наоѓаше пукнатини и во тројните блокови на противничките одбојкари. Решавачки за победникот беше третиот сет. Белорусите беа на праг да го освојат, но „црвено-жолтите“ не се предадоа. Го извлекоа последниот атом од силите, го однесоа на разлика и го решија во своја корист.
Четвртиот одеше, речиси, како подмачкан за избраниците на Никола Матијашевиќ. Веднаш продолжија со силно темпо што разнишаната Белорусија не можеше да го следи. Предноста што македонските одбојкари ја имаа во текот на целиуот период резултира со пет меч топки од кои Милев ја искористи втората за огромната радост во арената „Стожице“ што беше зачинета и со чест од домаќините со познатата навивачка песна „Македонија навива за вас“ во изведба на Тоше Проески.
Утре попладне (17.30 ч.), македонската репрезентација ќе игра и против Словенија во последниот меч во групата Ц.