Руските истражители објавиле дека пилотот Рустем Шаликов, кој управуваше со авионот што во вертикална положба се урна на пистата во Казањ,најверојатно имал лажна дозвола за пилотирање пишува агенцијата Асошиетед Прес.
Портпаролот на комисијата Владимир Маркин изјавил дека неговиот тим верува дека неколку пилоти кои работат за мали регионални компании не се доволно обучени и дека повеќето од нив имаат лажни дозволи за пилотирање, набавени од центри овластени од страна на државната агенција за авијација.
Маркин изјавил дека пилотот на Боингот 737 добил дозвола од некој мал тренинг центар, кој веднаш по несреќата бил затворен. И копилотот на авионот што се урна, добил дозвола од истиот центар. Истрагата открила уште еден таков центар кој веднаш бил затворен.
Комисијата која работи на истрагата се сомнева дека пилотот воопшто не бил обучен да пилотира со Боинг и најави дека наскоро ќе го објават транскриптот од разговорот од црната кутија. Патничкиот авион Боинг 737 се урна во рускиот град Казањ на 17 ноември, при што загинаа 52-ца патници.