Бевме присутни ноќта кога имаше обид за уривање на споменикот на цар Душан, не го демантираме тоа. Тука сме и не се криеме, но прво откријте кој го нарача и го постави споменикот, а потоа ние ќе го кажеме нашиот став.
Ова за „Дневник“ го изјавил Изет Меџити, потпретседател на ДУИ и чаирски градоначалник, три дена по оштетувањето на споменикот на цар Душан на мостот „Око“ во центарот на Скопје. Триесетина насилници го оштетиле постаментот на споменикот, како и жезолот и крстот што цар Душан ги држеше в раце.
Меџити не потврдува дали во саботата, еден час по полноќ на Мостот на цивилизациите во Скопје биле присутни и пратеничката Ермира Мехмети, министерот за економија Ваљон Сараќини, шефот на кабинетот на Али Ахмети, Артан Груби.
На оваа тема попладне се очекува да расправа и највисокиот партиски орган – централното претседателство, по што ќе биде обелоденет ставот на ДУИ – дали тие ќе го отворат прашањето за цар Душан и на владина седница в среда.
Меџити не сакаше да коментира зошто претседателот на чаирскиот разгранок Беќир Асани, лично учествувал во уривањето на споменикот.
За оштетувањето на споменикот јавноста беше информирана преку видеоматеријалот на телевизијата „Алсат М“, објавен на официјалната фејсбук-страница на чаирскиот разгранок на ДУИ.