Зеќир Рамчиловиќ е предложен за нов потпретседател на Собранието од страна на пратеници од ДУИ и од СДСМ.
На предлогот кој вчера е доставен до Собранието се потпишани 23 пратеници – меѓу кои Ејуп Алими, Џевад Адеми, Мирсада Емини, но и потпретседателката на Собранието од редовите на СДСМ Фросина Ременски, Бетиан Китев, Мира Стојчевска, Александар Филиповски и други.
Рамчиловиќ ќе го пополни испразнетото потпретседателско место во Собранието на Весел Мемеди кој даде оставка од функцијата пратеник.
Претходно, Рамчиловиќ кој беше дел од Независната пратеничка група на ВМРО ДПМНЕ преку писмен допис го извести Претседателот на Собранието Талат Џафери дека ја напушта пратеничката група. Се очекува по изборот за потпретседател, Рамчиловиќ да се изјасни дали ќе дејствува како независен пратеник или како дел од пратеничката група на СДСМ.
За предлогот Рамчиловиќ да биде нов потпретседател ќе се гласа на попладневната собраниска седница.