Со цел да се укаже на лошите услови во кои работат и живеат сексуалните работнички и работници, под организаторство на Граѓанската иницијатива СТАР-СТАР, сексуалните работнички и работници, хот-лајн линиите, масерки и масери, денеска одржаа марш од улица „Македонија“ до плоштадот Карпошово востание со симболичен црвен чадор кој има за цел да ја покрене свеста кај луѓето.
Според организаторите, во Македонија се одвиваат репресивни мерки врз овие работници, а истите ги ставаат оваа категорија луѓе на маргините на општеството. Побараа од јавноста и релевантните институции итна интервенција за безбедност и заштита на овие луѓе.
Фактот што речиси секој учесник во маршот избегнуваше да зборува пред камера, според активистите за човекови права е само уште една индикација со каква репресија и услови се соочуваат луѓето кои работат на ова поле.
Неофицијално и зад камерите велат дека не се задоволни од третманот во институциите, од тоа што немаат никакви права ниту здравствено осигурување, а неретко се и физички малтретирани и омаловажувани од макроата и од клиентите.
Маршот се организира по шести пат во Скопје, а годинава за прв пат и во Охрид, Тетово и Струмица, со апел да се почитуваат правата и да се подобрат условите за работа на сексуалните работнички и работници во земјава.