Денес се одржа последното рочиште пред пресудата во случајот Мијалков против „Фокус“. На распитот искази даваа главната уредничка на неделникот „Фокус“ Јадранка Костова и новинарот Владо Апостолов кои се тужени од страна на директорот на УБК Сашо Мијалков поради пренесена изјава од поранешниот амбасадор во Чешка Игор Илиевски, во кој што текст амбасадорот тврдеше дека имал притисоци од првиот човек наУБК.
Сашо Мијалков не се појави на распитот, а на прашањето на судијата зошто не е тука, неговите застапник одговори кусо дека директорот е „спречен поради маглата“.
Распитот требаше да се одржи пред две рочишта, но беше одложуван поради отсуството на Мијалков. Одбраната инсистираше тој да се појави на распитот и да објасни колку е повреден и навреден и во која мера му е нарушена честа. Првиот пат распитот се одложи бидејжи адвокатот на тужителот тврдеше дека Мијалков не бил уредно повикан, а вториот распит се одложи поради неговите службени обврски. Овојпат во прашање беше маглата, но распитот сепак се одржа со Костова и Апостолов.
Побарувањата на тужителот се големи: по две илјади евра од новинарот Владо Апостолов и поранешниот амбасадор кој е исто така тужен и 10.000 евра од уредникот Јадранка Костова.
За тужбата на Мијалков против „Фокус“ летоска интерес пројави и специјалниот известувач за слобода на изразување на Обединетите нации Франк Ла Ру. За време на својата посета во земјава Ла Ру се појави во Основниот суд 2 со намера да присуствува на судењето, но тогаш рочиштето беше одложено. Тој истакна дека е особено заинтересиран за овој случај нагласувајќи дека новинарите не треба да одговораат за пренесени изјави,
-Многу сум заинтересиран за судењето на Фокус бидејќи е врзано со слободата на изразувањето за што треба да се заинтересирани сите. Медиумите не треба да бидат одговорни за пренесување на информации од трети страни, а третата страна може да биде самата одговорна за изјавите, истакна Ла Ру.
Ова судење го следат и меѓународните и домашни организации чии претставници редовно присуствуваат на судските рочишта.