Ќе биде ли доволна деблокадата на 40 закони во Собранието, кои се поврзани со примена од 1 јануари, како што потврди, претседателот на Парламентот, Талат Џафери, на денешниот брифинг со новинарите за да нема отстапување од договореното кај шефот на државата Стево Пендаровски – предвремените парламентарни избори да се одржат на 12 април.
Меѓу законите, кои треба да бидат поддржани и од ВМРО-ДПМНЕ се и оние за покачување пензии, за покачување на платите, за стечајните работници, но и закони од областа на здравството, социјалата и финансиите. Ако не се усвојат законите, како што најави премиерот Зоран Заев, можно е на утрешната седница на Централниот одбор на СДСМ да биде донесена одлука за пролонгирање на датумот за повлекување на Заев од премиерското место (3 јануари) како и датумот за формирање техничка влада.
„Утре вечер имаме состанок на Централниот одбор на партијата, најважинот орган на кој ќе се разговараат овие прашања за техничката влада и изборите. Ќе се донесе одлука. Убеден сум дека во наредниот период ќе има комуникација меѓу партиските лидери. Утре ќе го видиме однесувањето на опозицијата во врска со сите закони врзани со рокови кои треба да почнат да функционираат од 1 јануари. Јас сум убеден дека опозицијата утре ќе ги поддржи како процес низ Парламентот и дека ќе немаме причина за таква дебата.“, изјави денеска во Собранието пратеникот од СДСМ, Хари Локвенец, кој потврди и дека за Законот за одбрана нема договор и дека тоа може да предизвика застој во членството на Македонија во НАТО.
„Со неодговорните и лицемерни постапки ВМРО-ДПМНЕ создава ризик да испровоцира ново вето од Грција. Законот за одбрана е клучен за нашето членство во Алијансата. Неодговорно, несериозно и недозволиво е членството во НАТО да биде загрозено од пратениците, особено сега кога ратификацијата на Протоколот за пристапување е на самиот крај. Овој парламентарен состав има чест и обврска да ги спроведе зацртаните цели што обезбедуваат полноправно членство на државата во НАТО“, додаде Локвенец.
Од ВМРО-ДПМНЕ, пак, велат дека во купот закони со кои СДСМ го уценува одржувањето на изборите во април се и измените на Законот за опојни дроги, кој, како што нагласуваат нема да го поддржат по ниту една цена. Овој закон Владата се обидела, како што вели опозицијата, да го протне злоупотребувајќи го европското знаменце во екот на дебатата во ЕУ за доделување датум за преговори на Македонија. Евентуалното одложување на вонредните парламентарни избори, според политичките посматрачи, се заканува да предизвика сериозна политичка криза.
Првиот претседател на повеќепартиското Собрание во земјава, Стојан Андов ги толкува актуелните меѓупартиски калкулации и надмудрувања како доказ дека државата и по 30 години има сериозен хендикеп – „тоалетно третирање“ на политичките договори, кои како инструмент има клучно значење во парламентарната демократија.
„Јавноста беше известена дека партиите се договориле да има избори на 12 април. Тие толку беа меѓу себе сигурни што отидоа да му соопштат и на претседателот на државата. Јас на тоа гледам како на сериозен политички договор. Тој договор требаше да биде публикуван за јавноста да ги дознае деталите. Односно постои ли во него некаква обврска до двете страни – за власта почитување на роковите за формирање техничка влада, а за опозицијата да не го блокира Собранието и носењето на законите или се било на жими мајка. Ако тоа го немало тоа е пропуст и затоа сега се случуваат вакви работи. Доколку опозицијата немала обврска во делот на нејзиното собраниско делување тогаш вината би била на страната на оној кој сега сака да ги одложи изборите. Во спротивно виновна е опозицијата“, вели за Нова ТВ, Стојан Андов.
Во меѓувреме владини извори брифираат дека Заев во сабота во 17 часот во Владата ќе одржи средба со лидерот на опозициската ВМРО-ДПМНЕ, Христијан Мицкоски. Но, во тие информации забележливо е дека не се споменува потребата од расчистување на патот за таа воопшто да се случи, туку се зборува за консултации за техничката влада.
Со измените и дополнувањата на Законот за Влада се предвидува сто дена пред одржувањето на избори за пратеници, а по претходна оставка на премиерот, Собранието да избере нова, преодна Влада за спроведување на парламентарни избори, предводена од нов премиер, кој го номинира партијата со најголем број пратеници во парламентот. Ќе бидат избрани и нови министри за внатрешни работи и за труд и социјална политика, како и тројца заменици министри.
Она што е важно да се нагласи е дека министерот за внатрешни работи го предлага партијата во опозиција со најголем број пратеници во Собранието, но по претходна консултација со владејачкото мнозинство. Таква консултација на ВМРО-ДПМНЕ нема да му треба за својот предлог за Министер за труд и социјална политика. Наводно, Заев и Мицкоски на средбата в сабота ќе ги усогласуваат токму ставовите околу опозицискиот предлог за прв човек на МВР, во чии ингеренции, меѓудругото, спаѓаат и најмногу 15 разрешувања или распоредувања, на пониско или повисоко место на носители на раководна позиција во министерството. Тој ќе може да изврши и хоризонтални распоредувања на вработените кои се на негов предлог во бројката до 10 отсто од бројот на хоризонтални распоредувања. Тие алатки за кадровски ротации во рацете на новиот прв човек на МВР, секако дека, во фото-финишот може да го успорат договорот меѓу власта и опозицијата.