Во Бангладеш денеска се одржуваат парламентарни избори, а голем број граѓани нема да излезат на гласање, имајќи предвид дека опозицијата вчера започна дводневен штрајк поради како што вели, „изборната измама“.
Покрај бојкотот, изборите ги обележи и насилството кое се заканува да создаде криза во оваа азиска држава. Само денеска во насилство загинаа шест лица, а утрово се затворени 120 гласачки места поради напади, палење на гласачки ливчиња и изборен материјал.
Поради страв од напади и насилства, во кои околу 159 луѓе ги загубија животите пред изборите, ангажирани се околу 50.000 војници за безбедноста ширум земјата.
Полицијата соопшти дека од синоќа до утринава биле нападнати повеќе од 200 полициски стници во Бангладеш.
Во квартот Мирпур во главниот град Дака, каде се регистрирани околу 24.000 гласачи, во првите два часа гласале само 25 луѓе.
Бидејќи опозицијата ги бојкотира изборите, во изборната трка ќе бидат главно кандидатите на владејачката партија Авами и нејзините сојузници.
Премиерката Шеик Хасина, и покрај тврдењата дека изборите се фарса, одлучила дека тие мораат да бидат одржани. Опозицијата инсистираше Хасина да поднесе оставка и да ја предаде власта на независно тело кое би ги набљудувало изборите, но таа ги отфрли ваквите барања.
Но опозициската Национална партија на Багладеш, која ги бојкотира изборите, и покрај генералниот штрајк веројатно нема да може да го спречи повторниот избор на актуелната премиерка.
Од распишувањето на изборите во октомври минатата година, во насилство во земјата загинале околу 150 луѓе.