Европската Унија денес оцени дека гласањето во косовското Собрание за недоверба на владата предводена од премиерот Албин Курти довело до тешка политичка криза во момент на актуелната криза со коронавирусот.
„На Косово му е потребна стабилност и насочување на сите напори во борбата против кризата со коронавирусот и заштитата на здравјето на луѓето“, изјави портпаролката на Европската комисија Ана Писонеро.
Таа порача дека сите политички лидери на Косово во оваа ситуација мора постапуваат одговорно и во интересот на народите на Косово.
„Ова вклучува преземање на сите потребни мерки за управување со пандемијата и нејзиното влијание врз животот на луѓето, општеството и економијата“, наведе портпаролката на ЕК.
Европската комисија напомена дека чекорите кои доаѓаат по вчерашното гласање во косовскиот парламент мора да бидат во согласност со косовскиот устав.
Со мнозинство гласови во косовскиот парламент синоќа ѝ беше изгласана недоверба на владата. За падот на владата синоќа гласаа 82 пратеници, 32 беа против и двајца беа воздржани.
Премиерот на Косово во должност, Албин Курти, во првите реакции Курти се пожали дека зад паѓањето на Владата стои специјалниот пратеник на американскиот претседател Доналд Трамп, Ричард Гренел. Тој е човек од доверба на Трамп, задолжен за дијалогот Белград-Приштина.
Според него пораката од Гренел е дека „во косовското собрание има 80 пратеници кои се подготвени да ги жртвуваат здравјето на граѓаните за да се реализира планот за размена на територии“.




