Како и многу други занаетчии, така и берберот Седат Османи во време на ширење на коронавирусот внимава, но и ги почитува препораките на Комисијата за здравство. Задолжително ги прашува муштериите дали дошле од странство и каква е нивната здравствена состојба, па потоа ги седнува на берберското столче. Внатре влегува по едно лице, а во овој период берберницата работи само неколку часа во текот а денот.
„Со вирусот сега помалку работиме, се плашиме од заразата. Дај боже животот да се врати во нормала и да продолжиме со другарувањето“, накратко ни рече Седат Османи.
Берберницата на Седат е лоцирана во комплексот познат под името „Базар“ во центарот на Тетово. Роберт Јаковчевски беше првиот муштерија рано наутро. Тој работи во ресторанот кој се наоѓа на неколку метри од берберницата. Вели дека е задоволство да се потстрижува кај Седат. Најдобар е во градот, но и најпријателски настроен.
„Тука е супер и тука одам веќе четири години, супер е се. Цел ден го поминуваме во добра атмосфера. Јас тука работам во еден ресторан, ама без разлика пак сме заедно. Претходно се потстрижував на друго место. И тука го избрав овој бербер дека е најдобар, ама и муабетчија е. Супер ни е тука не се прави разлика дали некој е Македонец, Албанец или Турчин“, рече Роберт Јаковчески
Седат Османи со оваа професија се занимава уште од дете, цели 18 години. Неговата берберница можеби ги разби стереотипите кои постоеа во Тетово – Албанци да се потстрижуваат кај Албанец, Македонци кај Македонец, а Турците кај Турчин.
По националност е Турчин, но кај него се потстрижуваат претежно помлади лица од разни националности.
„Со оваа професија се занимавам 18 години и се запознавам со многу луѓе. Имам муштерии од сите етнички заедници, имам и другари меѓу нив. Тие што ме почитуваат и јас ги почитувам. Имаме муабет. Овој занает почнав да го изучувам во Горна Чаршија, многу го сакав и одев на школо, но одлучив да продолжам со ова. Не гледам етникуми, јас гледам само да е човек, што да е само да биде човек. Ако е човек, јас сум уште поголем човек. Другарувам со сите националности, одиме на кафе, на забава, шетаме имаме добар муабет. Тоа е најважно. Треба политичарите и повозрасните да учат од нас“, рече Седат Османи.
Османи се надева дека состојбата со коронавирусот ќе помине што побрзо, а животот и другарувањето во комплексот „Базар“ ќе продолжи и натаму во здрав и мултиетнички дух.